關心妍（Jade）回到家鄉佛山南海舉行《聽 2026 演唱會》，猶如衣錦還鄉，吸引近五千名樂迷入場支持，好友張栢芝亦送來花籃祝賀。
後台的女兒楊榮心全程興奮，除帶領眾人祈禱，還模仿媽媽化妝整頭，星味十足；今次她擔任特別嘉賓，一改以往表演側手翻的環節，改以打鼓和媽媽合奏經典歌《負擔不起》，帶來新驚喜。Jade 透露讓心心上台表演的原因， 「唔經唔覺咁大個女，我問佢紅館試過打翻筋斗、合唱、清唱，我覺得佢又長大咗，咁啱佢開始學打鼓，我叫佢練下先， 練到差唔多就幫我打， 佢真係苦練半年！」她又為心心的表演而擔心得汗流浹背，「頭先台上我都唔敢望佢，忍住唔好打攪佢，佢好淡定但我就緊張到背脊出汗，依家係佢表演完我鬆一口氣！」心心下台後亦在台邊跟唱、拍手撐媽媽，她正在學習單簧管，希望日後有機會在舞台展示，又搞笑自爆家中音樂實力排名，「喺屋企媽咪音樂最叻，跟住就係我，爹哋係最渣！有時我喺屋企都會打鼓、媽咪負責唱歌，爹哋會做和音，不過係唱唔啱嘅和音。」
Jade 開騷時以南海話同鄉親打招呼，準備五套造型獻唱多首金曲，場外同時設慈善攤位為弱勢社群籌款。她坦言經常返佛山開騷，密度甚至比香港更高，可惜行程匆匆，加上女兒要上學，一直未能讓她好好感受家鄉。母女登台前心心還一邊陪伴一邊溫習理科，Jade 亦分享分工，由她負責女兒中文、數學，丈夫主力英文，確保學業不受影響，她亦期待日後帶女兒體驗當地熱鬧的龍舟節。
踏入出道 25 周年前夕，Jade 心願是把巡演終點放回香港紅館：「其實上次紅館20周年開始，已經差不多五年時間，亦就快出道25周年，忽然間嚟到25周年，一直都希望最後站係返香港，我哋都睇下紅館個期批唔批， 希望可以返去紅館， 有機會可以喺紅館做我25周年香港站。」演唱會結束後，大會安排貼地大排檔慶功，Jade 逐席敬酒，亦趁機讓女兒品嚐地道美食。
