吳卓羲（Ron）、張曦雯（Kelly）、姜大衛、陳瀅、陳煒、蔣祖曼、陳曉華等今日（15日）出席劇集《璀璨之城》宣傳活動，現場播放高海寧主動向Ron投懷送抱親熱畫面，令全場即起哄，「場戲都難拍，因為凌晨3點先拍好夜好眼瞓，之前拍咗成日戲，好彩高海寧唔怕我拍咗成日戲，身水身汗咪錫落嚟囉。（咁使唔使事前同Kelly備案先？）佢係專業演員，本身會睇劇本。」
張曦雯早前接受訪問時講出擇偶條件要靚仔、識講廣東話、喜歡小動物，原來Ron全中，Kelly即甜笑說：「所以就比啲空間我哋囉。」身邊的Ron同樣表示俾啲空間。問到家人有冇過問感情事，可有見過吳卓羲，Kelly說：「家人向來唔緊張，唔會問，之前拍戲時都有嚟探班見過，所以所有演員都有見過，家人都係say hi。」
向來喜歡攝影的Ron，問到近排是否經常為Kelly拍照？「由細到大都有影相，都專業，因為劇中我同佢係一對當然影佢多啲，一係影佢一係影高海寧，再唔係影江美儀，因為同佢哋都有戲分，（咁Kelly咩角度最靚？）佢每個角度都靚，唔好講呢啲，我哋正經。」對於早前兩人出席宣傳活動時甜度滿瀉，被網民大讚sweet，Ron說：「所以劇中我哋演得似，戲又好睇，訪問唔通喊咩。」
更多現場圖輯：
