肥仔未到，阿佘都穩守得住。
佘詩曼今日（20日）在社交網貼上與吳君如，跟「雀腳」MIRROR成員呂爵安（Edan）、李駿傑（Jeremy）和柳應廷（Jer），及ERROR隊長梁業（肥仔）竹戰合照。
阿佘留言：「出門口之前媽咪問我去邊，我話同君如佢哋打牌。佢問我：『又係肥仔呀？』我話：『係呀，都係佢哋囉，做咩呀？』媽咪：『唉，你唔夠人哋打㗎，嗰個肥仔咁勁，不過唔緊要啦，玩吓之嘛，又唔係打得大，玩吓囉～』（聽得出佢對佢個女我係零信心，但係其實我內心沾沾自喜，因為我知道……肥仔要做嘢，佢要後上）
跟住阿佘以講馬口吻講述戰況，一出閘由她和Jeremy節節領先！中段雖然被Edan和Jer後來居上，狠斬她百幾番，但她自稱積穀防飢，一直處於穩守狀態。至於君如被他們的花式麻雀，又「五穀豐收」、又「大風吹」、又「奪命北」搞到暈陀陀，所以中場停戰，抱觀望嘅態度，嘆香檳先。
肥仔來到，就幫阿佘輪二百幾番俾Jer。
阿佘續謂：「尾段肥仔做完嘢嚟到，開頭教我打都好地地，但係因為我今日要做嘢，所以未打完、未計數我就要走，諗住肥仔幫我頂掂硬啦，點知…佢話輸咗鋪二百幾番俾Jer！結果我辛辛苦苦賺返嚟嘅錢，俾佢一鋪清袋，即係話……我一蚊都冇贏到！我絕對有理由懷疑佢哋係夾埋㗎！」
Edan搞笑留言：「唔使懷疑，係夾埋，下次再打。」肥仔則自嘲：「老貓燒鬚！」另一邊廂有份參演《正義女神》的黎澤恩，就點名在劇中飾演高大狀的陳煒，留言：「需唔需要請我哋高大狀呢邊同你上訴，有折！」煒哥亦有回覆：「我驚我輸得仲甘」！
