《中年好聲音3》昨晚（16日）一集是24強晉身20強淘汰戰，評審團除了固定班底肥媽、張佳添、周國豐，還有嘉賓評審黎瑞恩及音樂人伍樂城。
昨晚最高分數者，是獻唱趙傳首本名曲《我是一隻小小鳥》的劉洋，獲得97分，是《中年》系列史上第二最高分，與上輪獲得97分的陳芷盈平起平坐，向來聲線雄厚的劉洋，以時而細語、時而感情澎湃的狀態來呈現情感的推進，成功感動現場觀眾及評審，獲得全場如雷掌聲及一致好評，張佳添直頭忍不住尖叫。張佳添：「我又有四個字送畀你，大將之風，你係own咗呢隻歌，呢個係你嘅版本。呢首係好需要技巧嘅歌，但你畀我覺得你唔係炫耀緊你個技巧，而係一路畀緊驚喜我。」肥媽：「佢嘅感情，係真係由一個地上嘅雀仔，飛到去變成一隻大嘅鷹。」黎瑞恩：「我頭先唔覺得係一個比賽，我直頭覺得係一個表演，佢做到說唱嘅感覺。」周國豐指歌曲與劉洋perfect match：「懂得收斂咗，有鋪排，你唔單止唱緊情歌，你仲唱埋你嘅人生。」
被視為比賽熱門之一的占士丁丁，選唱了英文歌《Hello》，原本以為他以母語獻唱手到拿來，卻被指水平反而不及他之前獻唱《李香蘭》，肥媽與小恩子更搞笑地因為占占引發爭拗，肥媽：「佢可以收斂啲，其實女人好易氹，輕輕地摸吓得喇，一吓攬埋嚟好抗拒架。（意指占占唱得太用力）。」黎瑞恩：「但我鍾意佢好激動咁攬住我喎，咁點呀？！」另一位引發爭議的參賽者，是獻唱《活得比你好》的阮慧珊，肥媽與小恩子齊齊點讚，肥媽：「你感動到我，我鍾意佢嘅眼光，佢將佢嘅感情，用佢嘅歌曲、用佢嘅眼、用佢嘅表情去話畀你聽，但又唔係要殺死你咁。」黎瑞恩：「我見到佢眼神好堅定，你之前同今次（相比）好有進步，希望你繼續努力。」不過周國豐卻明顯不喜歡阮慧珊的演繹：「你個版本我係唔鍾意，我亦都覺得呢隻歌唔係好啱你唱。」
經過6輪單對單PK，李金凱隊與占士丁丁隊打和，需各自淘汰一名隊員，最終李金凱隊淘汰了獻唱《兒女》的林立峰，占士丁丁隊淘汰了獻唱《稱職》的宗倩如。值得留意的是，林立峰的演唱雖然有不少進步空間，但他的愛妻程度絕對超班！首先，他選唱《兒女》是因為太太愛無限翻煲《金枝慾孽》：「我老婆翻煲《金枝慾孽》翻咗五、六round之後呢，我就問佢做乜成日睇埋啲勾心鬥角嘅戲，點知當我企咗喺個電視前面五秒鐘，我就畀佢啜實咗，我唱呢首歌時代入咗（自己係）太監。」車婉婉聞言笑言：「你咁樣兜個圈嚟擦公司鞋（讚啲劇好睇），會高分啲㗎咩？」最後到發表淘汰感言時，林立峰再次盡展愛妻之情，並令坐在觀眾席的妻子感動至哭成淚人：「我要多謝我老婆，每一次練歌佢一定喺我隔離，佢會堅持喺我隔籬唱和聲，其實佢唔識唱和聲嘅，佢一直唱緊第二首歌，但我都多謝佢，多謝你！」
