《中年好聲音4 決戰大灣區》除了車婉婉，還加入了鄭衍峰做主持。昨晚(7日)播出的第三集再誕生多兩名5燈選手，分別為曾參加健身比賽的朱珠《如果沒有你》及雷小雷《唯一》，男女各一位「靚聲王」同場誕生。
當中35歲、網絡音樂主播雷小雷，憑藉超強唱功贏盡好評，一開聲已令溦溦發出驚嘆聲，率先撳燈，最終橫掃五燈佳績，就連「手緊王」周國豐亦讚不絕口，「今季暫時睇咗幾個賽區，都有好多把靚聲，你把靚聲唔係誇張，我會形容接近Hi-fi發燒，你把聲好靚喎！因為佢可能係音樂主播，佢控制聲音控制得好好。」溦溦更激動表示：「Sorry，我好激動，我好High啊真係！因為我想用四個字送畀你『恰到好處』，你嗰種舒服嘅感覺係由第一句開始令到我哋同你一齊入到首歌入邊。」、張佳添：「連續聽咗兩個靚聲好開心，一個女一個男，你唔Show off技巧好自然將首歌送咗俾我哋。」肥媽：「唱得唔需要力咁，好瀟灑，好開心聽到你唱呢首歌，揀啱歌同埋好適合你。」
同場還出現了一位音樂製作人黃藝輝，獻唱原創歌《凌晨香港》，他唱出第一句已經打動了海兒，最後需得3燈成績留在等候區。海兒坦言：「我係好鍾意你把聲，因為好坦誠好真誠嘅聲嚟嘅。」更透露自己原來經常夜瞓：「我都好多謝你寫咗首歌畀凌晨嘅香港，因為自己都好夜瞓，I think is a good vibe.」、周國豐：「你有你嘅態度，尤其係你嘅創作當中，對於表演者嚟講，嗰個態度係好緊要先至會令人記得。」、溦溦：「你把聲真係幾好，但你一到後面嘅時候越嚟越唔穩陣，如果你後面冇爆得咁犀利可能會好啲。」
《中4》共設香港、大灣區、新馬、美加澳及TVB藝人五大賽區，評審為肥媽、周國豐、張佳添、海兒及谷婭溦（溦溦）。賽制方面，第4季增設「盲選」，每位參賽者均只能以「歌聲」吸引評審撳燈，獲得0-1燈的參賽者將立即被淘汰，2-4燈選手入等候區等待翻盤機會，5燈選手將可直接晉級。
