無綫歌唱真人騷《中年好聲音》於周日（4日）播出的最新一集，可謂充滿洋蔥！是集有份登場的47歲柳冕，一位四肢傷殘人士，他鼓起勇氣、坐着輪椅登上今次舞台，目的是想以身作則鼓勵同路人。他說：「突然一個交通意外，令到四肢傷殘，真係好殘忍。喺機緣巧合之下，一隊義工band隊教我唱歌，我用咗5年時間，個丹田先識郁得返，係音樂帶返我出嚟，我哋殘嘅都可以追夢㗎，唔好放棄自己！」柳冕深情獻唱《無言感激》，評審伍仲衡被他充滿生命力的演出打動：「你俾到我感覺係講緊一個故仔，我記得你講過想做一個榜樣，想話俾人聽任何人都可以追尋夢想。」
另一洋蔥位，是46歲前商人陳敬賢「高山低谷」的經歷。陳敬賢獻唱呂方的《流浪花》，他的歌聲充滿着感情與故事，原來他20多年前曾北上創業打拚，並創出一番新天地，高峰時每月生意額曾高達3,000萬，惟後來生意遇上阻滯，最終變成一無所有，他流下男兒淚說：「最傷心係俾咗好大遺憾我屋企人，佢哋明明有個好好嘅起跑線，但係我做得唔夠好……其實之後嗰10年我都好down，好封閉自己，係音樂帶返能量俾我。」主持車婉婉及評審肥媽被他背後的故事所感動，全程拿着紙巾不停拭淚，肥媽寄語他說：「要信呢個世界係圓，記得有個睇相佬同我講，人十年一個大運，你都行咗十年衰運，冇得再衰啦。」
是集還有不少實力唱家班，35歲的音樂製作人何博文，據知他曾是Vici＠XiX其中一位歌唱老師。博文挑戰高難度獻唱《李香蘭》，期間他飆高音大曬唱功，伍仲衡讚他藝高人膽大：「最後chorus你竟然用真音，原唱都係假音，你都幾大膽！」張佳添則說：「你音樂感好強，加上你識得發聲，呢兩樣夾埋已經好無敵，冇諗過喺《中年好聲音》聽一首張學友嘅歌、係會變成一首新歌。」
