2024年8月，吳文忻（Nathaliie）於《明周》公開乳癌復發第三期，這一年零六個月的抗癌之路，可說是關關難過關關過，但阿Nat一直積極接受治療，更出自傳《因愛重生》，去年更以51歲之齡，勇敢實現歌唱夢想，推出首支個人歌曲《重生》，踏上頒獎禮舞台。
可是癌魔險惡，今個星期的CT Scan報告並不理想，細胞變異擴散至肝臟。其實阿Nat這陣子都覺得身體愈變虛弱，除夕當晚她更入了院，她坦言現在只能「盡做」和及時行樂。
阿Nat說，因為荷爾蒙藥和標靶藥的關係，很影響到她的情緒，當情緒來襲，她會選擇讓它發洩出來，「由佢發晒出嚟先，之後都要自己思考下，因為咩事呀？都要留意住自己，唔好俾負面情緒去主導，要攞返個主導權，灌輸自己一啲正面信息！我有時會聽下自己首歌鼓勵下自己，我覺得有用㗎，真係要不斷去鼓勵自己，同埋我諗依家，真係得主耶穌可以打救我，所以我將一切都交俾佢，自己要做咪繼續做囉！」
製作《重生》的時候，幕後班底同一時間為阿Nat造了兩首歌，希望給她送上希望和動力。早前阿Nat趁身體還可以的時候，走進錄音室，「第二首歌暫時叫《有愛無淚》，係一首好輕快嘅歌，亦係《重生》一個延續，有啲音調可以聯想到上、下集故事。其實我好期待，因為本身諗住有啲舞去配合，好希望自己狀況許可嘅時候，可以表演俾大家睇，但依家個condition真係差啲，都係俾自己動力囉！」
談到新的報告，阿Nat先嘆一口氣，不想預料的情況都發生了，「最近照咗CT Scan，去咗肝喇，肝嗰度好似3cm，胸嗰度已經大到12cm，因為真係好大嚿、好纏繞，淋巴嗰啲我自己都望到幾大嚿，咁樣囉……冇呀，一切都係繼續盡做啦！」
阿Nat透露，除夕當晚她需要入院輸血，「12月31號我入咗院輸兩包血，因為啲標靶藥會令到紅血球、血紅素低，嗰日低到醫生即刻叫我入院輸血，所以我嘅New Year’s Eve喺醫院度過，但1月1號就出返嚟！輸返啲血，個人有返啲精神，依家就將標靶藥分量減咗少少，食緊第二個月，睇下點樣囉！」
現時阿Nat最希望可以去郁動吓身體，「希望快啲pick up返個身體先，好想去做返gym，運動吓、排吓舞，希望可以囉！」
‧被訪者言論純屬個人意見，並不代表本刊立場
