黃澤鋒與陳麗麗齊受訪。
黃澤鋒與同齡太太陳麗麗於2010年結婚，但二人於2019年51歲之齡才誕下大女黃熙恩（小黃妃），並於去年以58歲超高齡，誕下細女黃熙喬「小貴妃」，成為一時佳話。
近日澤鋒與太太接受資深傳媒人徐蓉蓉網上頻道訪問，當中澤鋒談及與前無綫幕後工作人員Winnie的第一段婚姻外，陳麗麗亦罕有自揭跟澤鋒認識時，她有老公，澤鋒也有女友，正因沒有感情包袱，不是建立在男女朋友關係，在一些事情上有共同談話方向，反而更輕鬆愉快。
談及與澤鋒如何認識時，陳麗麗說：「我本身有一段婚姻，但係已到尾聲。是一個網絡情緣（與澤鋒），好早期嘅Facebook。」陳麗麗當時同事加了澤鋒做朋友，叫她也一起加，她就加了，也有聊過天。「有一日個同事話約佢食飯，佢話好，不如你陪我去，我話好似唔係咁好，我要睇吓方唔方便走出嚟，因為我始終都有個家庭，我係一個傳統人嚟嘅，我覺得唔可以立亂走出去見其他人。」就從那天開始，陳麗麗正式認識澤鋒，大讚澤鋒真人靚仔又Sharp。她展示第一日見面跟澤鋒的合照，澤鋒搭她的膊，她則掙起隻手保護自己。
陳麗麗表示大家都知對方有另一半，並會傾談給予意見，之後有些事情突然發生了，造就二人一拍即合，她的同事當然嬲她，至今已十多年。陳麗麗表示有些事從沒跟外界說過：「我話我會離婚，我同佢講，記住我唔係因為你而跟佢離婚，係我自己覺得問題出現咗，愈嚟愈差，冇辦法，呢一刻你同唔同我結婚又好，點都好，都唔關事，我都係做返自己單身，你唔需要負任何責任，唉吔死啦佢離婚因為我，我要揹飛，我話你唔好諗多咗，同你冇關係，我唔係迫你，我離咗婚你要娶我。我話你唔同我結婚，唔緊要，我想自己開心啫，因為我覺得好辛苦，我壓力嗰邊好辛苦，我想自由，因為我唔想做隻雀，喺籠入面嘅雀，我想走返出嚟自由啲，你唔使話我聽你要娶我，我當時咁樣同佢講嘅。」
陳麗麗坦言離婚過程都有卡住不太順利：「因為我唔想俾人知道佢嘅身份，佢（前夫）唔知道我有一個人喺側邊，係邊個嚟嘅。我前度就好想知道係邊個，我從來都唔俾佢知道，因為我唔想影響佢（澤鋒）嘅工作，我都要保護返佢，因為我覺得係我決定嘅事，唔關佢事，我點解要牽連到佢嘅事業或佢任何嘢，所以我Protect咗件事，到我真係簽咗字（離婚），我先俾佢曝光。」簽字離婚後，澤鋒就說去排期結婚，陳麗麗笑言已經沒讓她透氣。
