現年61歲、1985年香港小姐冠軍謝寧，近年成功由藝人轉型為商界女強人。她於2008年創立自家製作曲奇餅店，分店越開越多，更曾透露一年銷售額高達九位數字，因而被外界封為「曲奇皇后」，一舉一動備受關注。感情生活方面，她經歷兩段婚姻，與首任丈夫岑建勳育有兩女岑寧童及岑寧樂，兩人在2005年離婚；其後於2010年與拍拖多年的王德偉結婚，生活幸福穩定。
謝寧與拍拖3年的無綫攝影部主管王德偉於2010年11月5日結婚，婚禮在他們的住所舉行。
謝寧近日接受好友查小欣的YouTube頻道訪問，罕有深入談及人生起伏，直言自己「40歲個人先開竅」，過往其實長期處於不快樂狀態。她坦言：「我以前好被動，40歲個人先開竅，我發覺以前嘅生活一塌糊塗，好混亂，而係覺得我個人唔開心，好多嘢處理唔到，困喺個困局裡面出唔到嚟，嗰時係我人生最低潮嘅時候。」
岑建勳雖然分別與劉天蘭及謝寧離婚，不過跟前妻一直保持良好關係，三名同父異母的女兒亦感情深厚。
卸任港姐後，謝寧加入TVB發展，原本備受力捧、事業不俗，但她於1991年選擇放棄演藝事業，淡出幕前專心照顧兩名女兒。回望那段時期，她形容自己迷失又低潮，與丈夫關係轉差卻難以言喻問題所在：「我覺得佢同我係夾唔到，好似生活習慣、性格、相處模式，好多嘢都唔係好得，最慘係我哋冇嗌交，咁先死，嗌交仲知道佢諗乜，係完全唔嗌交，你又唔知我諗乜，又冇冷戰。」她更透露當時情緒困擾嚴重，只能不斷進食紓壓，「屈埋喺個心度好辛苦囉，係咁食嘢、係咁食嘢，我都唔知我係咪抑鬱，但係我冇食過藥啦，只係不停去食嘢，食到自己好肥。我覺得自己唔係好正常，所以我就要搵出路囉。」最終她認為分開對彼此更好，主動提出離婚。
謝寧與女兒岑寧樂（右）、寧童。
談到當年決定，她形容是人生重大轉捩點。當時女兒已長大並出國讀書，讓她有空間思考自身去向，「我嗰陣兩手揈揈就咁走出嚟，係淨身出戶，既然走得就唔好問人攞嘢，嗰時係我人生最worst嘅時候。」不過她亦強調岑建勳一直待她不薄，「岑生對我好好，佢冇畀過氣我受，只不過係夫妻緣份冇咗，朋友情同親人關係仲存在，我哋咁多年婚姻，似親人多過夫妻。」
對於演藝工作，她坦言從未打算重返拍劇：「我都唔enjoy拍劇，自然覺得辛苦。」她又分享，40歲前婚姻已不愉快，但為了孩子一直隱忍，希望維持完整家庭，「見到啲女咁細個，你又點忍心離開佢哋？」直到孩子長大，她才開始思考是否應該為自己而活，追求真正的快樂。謝寧亦觀察到，不少女性都是等子女長大後才面對婚姻問題，「原來唔係年紀大就可以白頭到老，反而係因為仔女都出身，就開始諗自己，想自己開心啲，要離開呢個屋企，唔要呢個男人，獨立過生活。」她認為自己的經歷並非特例，只是許多女性人生縮影的一部分。
