現年78歲的羅家英今年5月受內地訪問時自爆第四度患癌，並表示選擇不接受化療和電療，改以注射女性荷爾蒙針及服藥控制病情。近日，家英哥接受好友查小欣的YouTube頻道「紅查館」訪問，細談四度患癌的心路歷程，並解釋「放棄治療」因由，「我唔係唔醫，佢就唔係咁樣醫法嘅。我就去檢查，用嗰個同位素就照到我腹腔盤腔，有一點點一點點，得10粒8粒。以前個肝（肝癌時）就照出嚟有粒荔枝喺度，即係一粒荔枝咁大粒嘅嘢，喺個肝度，咁就切咗佢，冇嘢，唔使怕唔使療，呢個係04年嘅。」
2004年確診肝癌第3期的家英哥，當時需要切肝保命，2014年再發現肝臟有腫瘤：「14年就係呢邊，又嚟多個荔枝，又喺度，唔係復發，係另外一個地方再生多粒。嗰度冇復發，割咗冇嘢，好，切咗，又冇嘢。」直至2019年，家英哥前列腺組織發現有癌細胞：「切除晒前列腺喇，驗過報告都係冇嘢嘅，點知呢佢有啲嘢潛伏咗喺邊邊，係未曾成形嘅，佢自己慢慢成形，到而家佢成咗形，咁先知道。」他指腫瘤太多，未能完全切除，「醫生話得一個方法，就係打女性荷爾蒙。」
家英哥表示打女性荷爾蒙針可以抑制病情，控制癌細胞發展：「醫生話大概8年度啦，你等佢一路撳住佢，但唔係消滅佢，唔係醫治佢，等佢平和，但8年之後就壓唔住㗎喇。咁壓唔住要點呀，就要電療同化療。」他續稱：「我今年79歲，8年之後我都八十幾啦，電療化療之後，你畀多三年我呀，咁我嗰時都人唔人鬼唔鬼啦。」家英哥豁達表示：「咁呢個人生有咩用啫？咁我話咁仲好，我就決定唔會再電療，唔會再化療。除非發明新科技，將我病情控制到，等呢樣嘢。」他又指第一次患癌時心情沉重、恐懼，通過諗經平靜心靈，接後數次患癌已毫不害怕，家英哥決定在這8、9年內盡情吃喝玩樂。
家英哥曾透露每個月服的藥物費用不便宜，一個月要三萬元，他在節目中直言為治療癌症而花了不少積蓄：「割，最緊要一樣嘢係，你有冇錢？」但原來他從不買保險：「我唔信保險，咁我唯有儲埋儲埋囉，咁我以前都知道，我冇保險，我一定要有啲積蓄，咁咪使咗佢囉，第二次我又使咗佢囉。」他又指未花光積蓄：「仲有啲嘅，我冇叫到老婆幫我㗎，我唔使佢幫呀，千祈唔好同佢講呢樣嘢，佢亦都冇講過話幫，佢知道我有。（你啲性格唔俾人幫！）唔係，如果佢願意幫我，我都好樂意嘅。」
現時接受注射女性荷爾蒙的家英哥表示，身體出現變化：「打完針之後個人弱咗，好容易眼瞓，好攰，好唔鍾意講嘢，真係好唔鍾意被訪問，因為訪問不停講嘢。」又坦言：「前列腺切除咗之後呢，我個人定咗，淡咗，對於嗰個色字，（即係性慾淡咗？）係喇，冇呀，仲打埋女性荷爾蒙添，更加冇，慣咗，已經4、5年。」
