剛度過52歲（2月3日）生日的楊千嬅，日前於重慶舉行《52Hz Echoes生日限定音樂會》，提前跟歌迷慶祝生日，同時宣布今年將展開新一輪巡演《Live MY LIVE 1.0》，令台下歌迷十分驚喜。
當外界以為完成歷時21個月共53場的《MY TREE OF LIVE世界巡迴演唱會》後，千嬅會休息一段時間，不過她接受《明周》訪問時，她解說了決定再辦巡演的因由，而這次新巡演到底有沒有香港站呢？
新一輪的巡演《Live MY LIVE 1.0》，原來是由去年11月在紅館舉行的《Live MY LIVE》引申而來的，千嬅說︰「呢個叫《Live My Life 1.0》，其實源於香港《Live My Life》，點解叫1.0？當時同導演溝通之後，大家覺得不如我哋做一個前傳，因為《Live My Life》係講『回家』，回家途中一啲人生經歷，中間得到一啲人生智慧，係有正面message可以同大家講！我覺得歌手除咗係一個表演者之外，我哋同其他人一樣，都一樣面對人生各階段，一樣由細到大都發生好多事，只不過大家崗位上，或者我哋遇到嘅人唔同，處理問題層次有分別。《Live My Life》香港版係一個好personal故事，去到1.0嘅時候，當然有一啲音樂上面調整，亦希望表達信息再放大少少，因為嗰個已經唔係一個personal故事咁簡單。其實《Live My Life》有一part，大家見到一棵樹，由死灰變成種子再重新生長，其實係我自己人生其中一個領悟，當中有因果、有遊歷唔同地方後嘅眼界，亦都有一啲自我價值觀調整，有好多密碼喺裏面，今次就係想大家再仔細感受裏面種種溫度。」
《Live MY LIVE 1.0》的首站將在成都舉行，第一輪公布的城市有南寧、長沙、廈門、杭州、上海、深圳、南京、南昌、廣州、武漢、重慶和天津，至於香港站呢？千嬅就說︰「會唔會有香港站呀？其實有機會嘅，睇下到時去到遊歷四方找美滿人生嘅時候，有冇啲更加多領悟，可以有更豐富分享，咁我就會返屋企同大家分享！暫時就重新出發先，你見到香港最後一幕都係揚帆，為出發準備，其實每個階段有啲嘢想做嘅時候，或者你諗通咗啲嘢、開咗一個小竅，有啲嘢我好想重新再開始去做，睇下我今次處理會唔會更好？會唔會更進步？呢個先係生活意義，同埋我成日覺得，想做事做得好，首先要學習做人處事，對自己情緒梳理、對價值觀、對世界觀、對道德觀，其實每個階段都有唔同調整。開頭冇諗住咁快再做，但主辦單位覺得今次個回響幾好，或者喺歌迷嘅共鳴仲好深刻嘅時候，會唔會趁住大家仲有一種濃烈感覺，我哋一齊再深度去分享呢？所以諗咗一陣就答應，問心自己又真係好鍾意舞台，依家階段嘅自己，暫時最有滿足感嘅工作，亦好想繼續發掘自己一把更加好嘅聲，學海無涯，vocal好多嘢好有趣，Live演出係一種好踏實當下嘅感覺，我仲係好有熱誠同passion，趁仲有呢個力氣，不如再唱啦！」
