繼2021年合作歌曲《特務肥姜 2.0》後，相隔4年，Fatboy@ERROR與姜濤@MIRROR終於再度合體，推出全新師徒合唱歌《獅虎流》，集結「獅」與「虎」兩大「樂壇猛獸」，自成一派，強強聯手再掀話題。Fatboy表示：「我同姜濤相隔數年終於再度合體，今次延續『特務』系列嘅特色，打造出《獅虎流》，曲風相當有趣！」姜濤亦補充：「而且係師傅最擅長嘅唱跳，但風格同上一首合唱歌好唔同，希望大家多加留意！」
談到再次合作的原因，Fatboy坦言：「一來我哋真係好玩得埋；二來觀眾同Fans都覺得我哋嘅互動好有化學作用。《特務肥姜 2.0》推出之後，一直有人問我幾時再同姜濤合作。老實講，唔好話出合唱歌，就連一齊表演嘅機會都唔多，大家都知如果要同時請我哋出場，索價不菲，完全明白預算所限，哈哈！」
向來以搞笑見稱的Fatboy，對音樂同樣相當認真。《獅虎流》找來Y.Siu作曲、T-Rexx填詞、Edward Chan擔任監製，整首作品由零開始創作，逐步構建出心目中的理想曲風。Fatboy透露：「呢首歌唔係喺現有Demo揀出嚟，而係我搵咗好多作品俾幕後團隊參考，甚至直接哼畀佢哋聽，一齊慢慢打造想要嘅感覺，最後先誕生《獅虎流》。歌詞方面有搞笑同口語化元素，舞蹈亦加入無厘頭創意，好似『肩周炎』咁嘅招牌舞步，非常有趣！」
身為《獅虎流》的「生父」，Fatboy亦親自解釋歌名含意：「『師傅』梗係形容我同姜濤嘅關係，而今次係獅子嘅獅、老虎嘅虎，寓意我哋兩師徒好似娛樂圈嘅兩頭猛獸。我都諗過直接叫《獅．虎》，聽落好型，但又想承襲《特務肥姜》嘅風格，加上忍者一定隸屬某個流派，於是索性叫《獅虎流》！」
既然以忍者為主題，MV自然少不了大耍忍者刀的畫面。Fatboy以「ERROR流忍者」造型上陣，姜濤則化身型格「姜徒」，兩人在專人指導下學習刀法，動作有板有眼。不過拍攝期間「百厭姜」亦瘋狂上線，笑不攏嘴地把玩忍者刀，童心大發。跳舞時，兩師徒時而Chok到盡、時而古靈精怪，舞步與表情完全「神同步」，默契十足。Fatboy笑言：「之前拍電影都有學過用刀，識少少皮毛，今次MV特別請專家教我哋，希望做到最好，當係一份聖誕禮物送俾大家！」
