曾參演《缺宅男女》、《On Call36小時》與《降魔的》系列的黃智雯（Mandy），二O一八年更憑《三個女人一個「因」》成為星馬雙料視后和「民選最佳女主角」。
兩年前，Mandy宣布離開無綫，並與拍拖十一年的圈外男友結婚，這一年絕對是她的人生轉捩點。視后轉戰舞台劇，有人說她刻意減產，但Mandy坦言，從來對自己人生沒有特別鋪排，現階段在工作上追求質量，正如婚姻一樣，沒有刻意安排，便是最好的安排。
繼《薄伽梵歌》後，黃智雯（Mandy）將與楊詩敏（蝦頭）合演港式喜感舞台劇《天下無不西之閨蜜》，故事講述兩個性格南轅北轍，同樣失婚的閨密，決定同居生活而發展的趣事，「我同蝦頭喺電視台都有一齊拍過劇，亦合作過舞台劇《今晚打老虎》，但對戲機會唔多，所以今次知道對手係蝦頭，我真係非常非常之期待。」
Mandy更十分期待其中一場鬧交戲，「今次舞台劇，我飾演一個電台高層，但對生活是個不修邊幅的女強人，而蝦頭又相反，對所有嘢都有強迫症，甚麼都要井井有條，兩個都因為失婚而決定同居生活，由小學已經認識的朋友，理應好了解對方，但相見好真係同住難，生活上遇到好多磨擦，呢啲生活小細節的磨擦發生好多趣事。這個輕鬆喜劇可以帶出友情之外，亦反映好多現代唔同女性性格，有一場戲我好期待，我哋直情要肉緊到打交，一次過數晒對方的問題，講晒一啲內心最mean嘅嘢，對大家嘅不滿呀！」
坦誠與遷就之後要忍讓
一直與家人同住的Mandy，在三十歲時因工作太忙，與另一位閨密合租生活了一段時間，這些經歷讓Mandy今次在舞台劇大派用場，「其實我一直以來都同屋企人住，有屋企人照顧，其實非常幸福，直到開始拍劇，差唔多三十歲的時候，正式同一位好朋友同居，好似重新啟動我對生活上學習，當家人不在身邊時，你就會發現以前幾咁幸福，婆婆和屋企人每日都為我準備三餐，甚至唔俾我行入廚房，唔准我開火煮嘢食，收工返去已經有六餸一湯，係每一晚喎，所以到自己搬出來住，反而學識咗好多生活智慧，每日都要諗今晚食乜餸，總之最簡單，可能雪菜米粉就一晚，用最快捷方法，所以更加覺得婆婆非常之偉大呀！」
離巢後，Mandy突然宣布與拍拖十一年的珠寶集團高層男友Anthony結婚。成為人妻後，Mandy亦學識煮返幾味，「因為經過咁多年訓練，同埋其實都唔會想食咁多外賣，有時都會想食返屋企人嘅味道，我又唔會煮啲好複雜，要煎又要炸就未得，我會煮一啲家常小菜，平時六點收得工都會夠時間做到一餐，通常會問媽咪囉，我媽咪煮嘢好叻㗎，遺傳我婆婆，可能佢哋以前嘅美德，每餐都可以五、六個餸，仲有個湯！我最拿手？蒸水蛋算唔算呀？哈哈！其實好難㗎，Gigi姐（黃淑儀）俾咗個秘笈我，慢慢自己失敗咗又再整過，依家蒸水蛋都係我一個一個鐘之內搞得掂嘅其中一個menu，再整個節瓜粉絲煲，加個蕃茄湯，如果再多啲時間，可能會整個魚香茄子煲，煮嘢食我比較隨心，唔會跟住個cook book，因為我發覺最緊要係煮俾人嗰個人，同自己覺得健康好味就足夠！老公？我諗佢應該鍾意食嘅！」
婚後真正要跟另一半同居生活，Mandy覺得最重要是坦誠相對，「可能有過同女仔friend一齊住嘅經驗，我同閨密住嘅時候，我哋會約法三章，一三五你就負責呢樣嘢、二四六就到我，或者邊個就負責買呢樣嘢。依家結咗婚，其實我覺得每個人嘅個性、成長環境都唔同，自然有啲小習慣，現實係會有好多小磨擦，我會覺得首先要坦誠，除咗遷就之外，其實都要有一個好好溝通，結婚一齊生活冇咩祕訣，我覺得坦誠之後就係忍讓，可能我有一啲小習慣，就係永遠個垃圾桶唔知點解都係差三份一蓋唔到，十次有九次都係咁，可能對方會靜靜地幫你做埋最後一個step，呢啲應該算係生活上默契。」
不像以前可以自把自為
二O二三年，Mandy在社交平台公布婚訊，只透露已在外地完成婚禮，分享了三張照片，一張是婚戒照、一張是她幫老公整理煲呔的甜蜜合照，而另一張是她身穿婚紗的美照，簡單宣布成為人妻。
由拍拖至結婚，Mandy對這段感情都相當保護，現在她終於肯透露一些婚禮細節，「一直以來，我都覺得呢啲sweet moment，由拍拖到結婚，其實我都一直跟住我哋節奏咁行，屋企人亦都好支持，冇俾好大壓力，唔需要一定好鋪張或者要點搞，大前提都係想我開心。依家可以分享吓屬於我同佢嘅婚禮，因為真係冇特別邀請朋友，其實我哋喺紐西蘭結婚，紐西蘭係一個我好鍾意又未去過嘅地方，有一種地靈人傑感覺，又有好多大自然。當日基本上好簡單，除咗化妝整頭有特別安排，其實都冇計劃好多，冇轉造型、冇玩兄弟，我覺得我呢一方面都幾男仔性格！其實婚禮最緊要兩個人開心，所以big day嗰日，我完全乜都唔理，當做一件好隨心嘅事，依家睇返啲相，仍然覺得好開心好真摯，真係好屬於我哋兩個嘅一個時間囉！我好記得當時要讀誓詞，因為唔喺香港，相對地唔需要完全去跟足，誓詞只係一種你表達對方嘅愛意，我哋係自己去draft嘅。」
這個感動時刻，甚少流眼淚的Mandy，也終於「失守」，「其實唔知點解，拍戲就真係拍得多，讀誓詞或者結婚攞起頭紗嘅時候，原來到真係屬於你自己嘅moment，會有一種好感動感覺，係俾我自己打動到。份誓詞我相信在場嘅人，甚至律師們都唔會好明白我講乜嘢，不過嗰刻，我知道另一半一定會明白，覺得個世界就係得返你同對方，嗰一刻好感動囉，又多咗一份責任，原來當你去到一紙婚書嘅時候，影響唔單止係你自己，可能係人生上一啲選擇，以後就算一啲小事，大家都要商量，不像以前可以自把自為，係一加一嘅事。」
婚後Mandy好像減少了工作，因為她希望重質不重量，「其實冇特別話減產，呢兩年時間，離開咗公司之後，主要做多咗舞台劇，但其實又唔係自己刻意去鋪排，其實三、四年前，未離開公司嘅時候，我已經慢慢有去接觸呢個範疇，認識咗一啲以前APA（演藝學院）老師和導演，開始喺舞台劇有啲演出，慢慢累積，我真係冇刻意去安排，但我可以講嘅係，我覺得依家自己做緊嘅嘢，我好開心同覺得好幸福！我記得早前排戲，我望住對手講台詞，嗰一刻我感覺到會心微笑，因為依家我可以做一啲自己仍然非常熱愛嘅事情，演戲甚至乎舞台劇，今次其實係我等待咗好耐，好想參與嘅喜感舞台劇，對手同埋演員整個組合，都令我覺得好好玩，好真實好alive地去做，有呢份滿足感已經足夠了！」
化妝︰Zoe Fan
髮型︰Jay Cheung@Hola
