去年八月，吳文忻（Nathaliie）於《明周》公開乳癌復發第三期，並擴散至淋巴腺，其後一直積極面對治療；今年二月，細胞變異擴散到尾龍骨變乳癌第四期，左胸腫瘤有變大跡象，心臟及肺部積水，留醫十六天後，吳文忻說她走過鬼門關，更因為醫生一句說話，令她第一次感受到死亡。
在這一年的養病期間，吳文忻可說是關關難過關關過，由一度要坐輪椅、撐拐杖，現在行得走得，她亦為自己定下兩個目標，一是出自傳、二是出歌，她兩樣都做到了！新書《因愛重生》將在下月書展推出，她把病前病後所有經歷都娓娓道來，包括婚姻，原來，她與丈夫陳劍陵已決定分開。
上周三（18日），阿Nat吳文忻到中環為新歌《重生》錄音，她比之前精神飽滿了，步行亦沒有太大問題，錄音前接受《明周》訪問，她說︰「自從在《明周》公開咗（乳癌復發）之後，外界反應其實令我好surprise，你都知啦，我本身都諗住一次過講晒，之後就唔使煩，唔使再同每個人逐一去交代，諗住收埋自己專心做治療，但講咗出嚟，大家反應係好支持同好有愛，老實講，同我之前認識嘅世界好唔同，點解嘅？『吳文忻』入咗行咁耐，從來都冇試過有咁多人支持，當然，大家係出於同情心和愛心，但呢份愛真係愈來愈大，無論係識嘅朋友、唔識嘅朋友，喺街度大家見到我真係會講『文忻加油呀！』好真實！我亦好大感受，因為呢份愛都係我嘅動力！」
阿Nat的新書名為《因愛重生》，她說自傳就是想把最真實，毫無保留地說出來，由患病、家人、事業、婚姻、投資、孩子與宗教，全部與大家分享，她的目的是希望把自己的故事，給予同路人送暖寄愛，也想送給滿身傷痕，或在脆弱困惑中的人。
新書其中一個chapter「婚姻」，阿Nat於二O一一年與有「南丫島王子」之稱的金融才俊陳劍陵結婚，兩人於美國讀書時認識，雖然曾經分手但最終修成正果，兩人育有兩女，分別現年十歲的長女陳芊彤（Scarlet）和八歲細女陳施辰（Season）。
自公開病情之後，無論鏡頭前、鏡頭後，都甚少聽到阿Nat提及丈夫，記者亦好奇問及婚姻狀況，既然這本自傳如她口中「最真實」，阿Nat直說︰「確診之前，婚姻早已經有問題了，其實都同佢好耐啦，拍拖又好耐，可能當時大家都到了適婚年齡，這些年，我哋分開過亦一齊返，其實一路以來，離離合合問題都冇解決過，終於，我們都作出了抉擇。」
問阿Nat怎樣形容兩人現在的關係？她說︰「朋友！」自傳中，阿Nat除了透露她這段婚姻關係外，亦有詳談她與亡父吳朱榮的父女情，吳父Edmund退休後回流香港，偶然被星探發掘拍廣告，阿Nat試過陪父親一起試鏡，往後Edmund拍過不少廣告，更獲邀演出妮歌潔曼在港拍攝美劇《Expats》，飾演妮歌潔曼的老爺。
重拾夢想與自己對話
阿Nat續說︰「書入面有八個chapter，我爸爸都講幾多，去年十一月突然猝逝，又喺我抗癌呢段時間，其實真係雪上加霜，係好突然，教下畫畫就猝死，同學話佢只係伸個懶腰就暈低咗，佢話好攰，佢哋就扶佢坐低，救傷車嚟到已經即場幫佢做CPR（心肺復甦術），我接到電話去醫院嘅時候，其實冇幾耐佢已經走咗，好多同佢細個嘅事想講……」提到亡父，阿Nat的眼淚已經忍不住，「我記得同佢講患癌的時候，佢嘅眼神其實好擔心，又不斷要表現得唔可以擔心，佢走之前一個星期喺屋企食飯，我送佢出門口，我好記得呢個情境，我知道佢好擔心我！」
至於兩個愛女，阿Nat說她們十分生性，「其實我覺得我依家做緊嘅嘢，都係一個好好借鏡俾佢哋學習，我覺得身教最緊要，以後如果佢哋睇返，媽咪咁樣都撐得過喎，將一個病作為一個機會，去重新認識自己、同自己對話，去重拾返一啲夢想，對我嚟講今次係一個project，當一個project咁做啦，出埋本書，仲可以出歌，呢個真係我嘅夢想，細個想做歌手，可以企喺舞台，點知入行之後，一路個方向都完全唔係嗰回事，呢個圈好多嘢，都唔係你去控制，嘩！依家有個咁嘅機會喎，係咪好開心先？同埋好幫到我，如果唔係，我日日喺屋企坐喺度，都唔知做乜？病都病得有意義啲，同埋有啲寄託！」
這天錄音，更有多一個好消息，話說阿Nat找來馬永齡（Matthew）作曲及監製、黃敬佩（Peggie）塡詞、張浩霖（Cory）編曲及監製新歌，他們寫了《重生》後，再送Nat一個驚喜，Matthew說︰「最初我哋仲商量緊要做一首快歌定慢歌，因為其實出歌呢件事，對於文忻嚟講，係一件開心事，終於完成咁多年夢想，竟然有屬於自己一首歌，不過why not both？一首慢、一首快！」三位幕後功臣都是第一次聽阿Nat的歌聲，他們都大讚有被感動，尤其知道阿Nat的抗癌之路，更加被打動。
阿Nat說入行後都有試過登台唱歌，但香港朋友就應該未聽過，大家可以拭目以待！這天亦收到《重生》的歌詞，阿Nat在正式錄音前，揀了Sammi的《我們都是這樣長大的》熱身，阿Nat不是職業歌手，唱的是感受，聽的是故事，她希望用歌曲告訴大家，保持正面態度積極面對，或許，會迎來新轉機！
花絮攝影︰伍敏慧
化妝︰Jenny Tziong
形象︰Ceci.S
