【年初三】四福Sing約埋食盆菜 欣宜憶肥姐最愛「笑蝦蝦」

「寰亞四福Sing」馮允謙Jay、鄭欣宜Joyce、黃淑蔓Feanna和趙祥誠Ben團年食盆菜，寓意虎年盆滿砵滿，財運亨通。在外國長大的Jay和Joyce，特別喜愛傳統節日的美食，每一樣都讓他們勾起與家人溫馨的回憶。Joyce第一時間夾起「蛋角」興奮地說：「我屋企過新年一定食『蛋角』，因為好似元寶，錢呀！」然後她再夾蝦給各人，「媽咪最重視開心同埋笑，所以新年一定要食蝦，『笑蝦蝦』！」四位歌手邊食邊講新年展望，Feanna透露今年將大學畢業，她說：「去年除咗返學和出咗一首歌，仲拍咗第一部電影，今年畢業後我就踏入人生另一個階段，做全職藝人。」

最愛唱歌表演的Jay說：「我希望年頭年中年尾都開演唱會，父母繼續留喺香港捧場，仲有我希望今年寫多啲歌，好多歌債，剛才Joyce又追我歌了！」而Ben除了拍廣告和演舞台劇，還積極學唱歌，他說：「希望今年可以推出屬於自己嘅歌，雖然未諗到攞獎咁遠，但我會努力唔會辜負Fans和大家對我嘅愛，朝住攞新人獎進發。」至於Joyce透露去年開始學彈鋼琴，希望今年學有所成在舞台上表演，她說：「希望今年可以自彈自唱一首歌，搵一個舞台表演俾大家睇，請大家期待2022年鄭欣宜嘅音樂世界。」

新年習俗多，年紀輕輕的Feanna跟到足，她說：「年卅晚我會唔瞓覺同屋企人迎接新年，媽咪會包餃子，仲會喺其中一啲餃子裏面放黑糖或者開心果，邊個食中就代表佢今年會行好運。」Jay就搞笑地說：「我新年會著紅色底褲。」在旁的Joyce聽到馬上尖叫。
四位歌手更即席寫揮春比併創意，將名字融入揮春祝福語之中，Feanna的「蔓（萬）事勝意」和Ben「吉祥如意」都好有心思。Jay認識太少中文字，結果他又中又英，還有他自家英文併音字，令人看得一頭霧水，其他三位從旁指導他寫中文；同樣在外國長大的Joyce，眼仔碌碌想了一會，胸有成竹地說：「我啱啱出咗張唱片叫《Joyce To The World》，我想呢張揮春裏面有Joyce，仲想加埋中文名。」她紮好馬步先畫了一個月亮，然後是「Joyce」、「宜」，最後畫了一隻烏龜，Feanna立即估到：「滿載而歸！」