酷熱天氣警告下，阿波及波嫂，在其經營的車房外，迅速又有默契地為客人的汽車進行清潔。他們倆一個負責車身、一個負責內籠，同時亦招呼正在等候的客人。直至兩個多小時後，等候客人終於清空，波哥慢慢道來他的紋身故事。
阿波出身黑幫家族，父親是一個幫派分支的頭領，父親的親生兄弟也同是「撈偏」，偏偏阿波對父親及叔叔的行為甚為鄙視。初中時侯，阿波喜歡帶着同學四處玩樂，漸漸就成為同輩中的小頭目。「當時只係一班𡃁仔貪玩，冇入黑社會㗎。老竇講過有朝一日交棒俾我，我都一口拒絕。」可惜，十七歲那年，因一次同學犯事，連累到阿波被判入勞教中心。此後，便覺難逃家族命運，他離開勞教所後，就正式加入另一個幫會，身上的紋身亦由那時起紋。
「自問又唔係高大，又唔係特別打得。紋身只係工作需要，想睇落兇啲，想人認得我。」
「有一日，我帶同一行六、七個𡃁仔，落尖沙咀紋身。去之前已諗住個個都係紋百鬼夜行裏面啲鬼，成隊人咁先有台型㗎嘛。我自己就揀咗夜叉先，不過其中有個𡃁仔想標奇立異，揀咗紋條龍喺背脊，哈哈，點知佢紋到一半，痛得滯痛到暈咗。哈哈，早幾年見返佢，仲係嗰半條龍。哈哈。」
「不過，紋身真係好痛，我紋咗一邊手臂後，要等兩個月，先敢再紋埋另一邊手。哈哈，原來關公刮骨療傷真係好鬼痛㗎。」
阿波正式加入黑社會後，隨着地位提升，進出監獄愈來愈頻密，直至第四次服刑期間，才決心脫離這種生活。「因為當時識咗現在的太太。我坐緊監時，太太仍不離不棄地等我，所以就下定決心改過。」
現時，阿波除了與太太合力打理車房生意外，還有一對就讀中三的兒子及小三的女兒。回想過去，阿波認為身上的紋身，在不同階段有着不一樣的意義。
「當初紋身只係工作需要，到後來脫離黑社會，有自己家庭同事業，紋身就成為我嘅污點。好大段時間，就算大熱天時，我都係着有袖嘅衫遮住（紋身）。唔想人知我有紋身，唔想人知我曾經『出嚟行』。就算接送仔女返學放學，只揀在秋、冬季先會出現，其餘時間也是由媽咪代勞。」
「到咗宜家，可能因為宗教關係，學會放下。紋身就成為一種警惕。我會直接同阿仔講，老竇以前係壞人嚟㗎，唔好學啊。又會同啲識嘅後生仔講我嘅經歷，希望佢哋唔好行我條路。」
