《億男》的藤原龍也勞師動眾，教父咁款上台做騷，教人看破金錢，不要被迷惑，實質就是為了呃錢。香港一男子派錢，自稱「劫富濟貧」（亂用成語隨時惹官非啊，有無好心人送本成語參考書過佢？）。佢平日推銷「挖礦機」及「教人投資」，曬靚車大屋，為乜唔多使我講。只想講你以為電影荒誕誇張，世道還是技勝一籌。
錢作怪？其實是人心作怪。
給你横財三億（日元，都好多㗎喇），你會點？《億男》主角佐藤健選擇搵大學同學高橋一生問佢筆錢應該點用，高橋叫佢換晒現金感受下筆錢，佢又堅聽話。雖然鋪晒線話高橋一生係個出色商界奇才，不過睇到呢幕，真心覺得此乃不思議奇談。喂阿哥，投入唔到喎！佐藤健本身孭住一大筆債，唔攞去還咗先？真係咁相信呢個無見十年嘅朋友？哈，後面劇情又俾你九曲十三彎地兜得番，有啲驚喜。
劇情順理成章講高橋一生夾帶私逃，佐藤健展開追蹤，找他的生意夥伴逐一查問，過程有啲似推理。賽馬落注一段道理唔係無，但劇情處理稍突兀。北村一輝的嘈吵投機肥佬扮相難解，肚腩及髮型都假到哭泣，極度阻礙本人投入故事。
電影鋪線鋪到長過長城，開場派對冗長，中間也有溫吞位，尤其佐藤健與太太黑木華的相處及對話。不過兩位男主角、藤原龍也及澤尻英龍華演出的確生色不少，人物刻畫也頗紮實。
此片改編自川村元氣小說，要人反思金錢意義。喜歡電影著墨中獎後，彩票機構如何溫馨提示幸運兒中獎有可能變成不幸，甚至有本手冊教人面對一夜暴發，整段呈現得頗幽默。而佐藤健每見一位高橋一生的生意夥伴，都會對金錢有新睇法，劇情也同時在啟發觀眾。
電影至中後段開始講兩位男主角的情誼，由一同參與「落語學會」開始（落語是日本傳統表演，一個人在台上講滑稽故事，類似棟篤笑）。高橋拿手講的古也與錢財有關。謎一般的高橋一生在佐藤健回憶中，終於變得有血有肉。三億的下落與他們昔日一次摩洛哥之旅有關（鋪咗咁耐終於揭開）。二人相視而笑，坐在沙漠看日落，你表演落語我欣賞，都隱隱滲出bromance（媽，還是我太腐女？）不得不讚摩洛哥風光壯麗，某些橋段確有意思。突發事件觸動高橋一生創業，也影響他對「價值」的看法，雖則迂迴，總算打通咗任督二脈。金錢係電影幌子，人對$$的執迷與放開才是主菜。不論親情、愛情及友情，被金錢綑綁，終究會變質，所以才顯出澤尻英龍華這位隱形富婆的超脫。
斬咁啲雞肋，呢碗心靈雞湯其實幾滋補㗎！
（劇照由電影公司提供）
