做拍檔，最重要有火花，陳志雲（Stephen）和葉童雖然第一次拍檔，但火花「啪啪」聲，埋位影相時，親密又得，玩嘢又得，有說有笑情緒高昂；陳志雲說今次在舞台劇《莎士對比亞》中，葉童又男又女又要穿梭，古裝時裝不斷變，換衫可能是個大問題，「導演建議她在台上換，都是一個好噱頭。」葉童回應：「我怕換換吓會跌咗嘢出來喎！」記者說叫陳志雲幫手執啦！Stephen就搶答：「不可以，我同她有條界㗎！」在劇中，二人有感情線，Stephen要跟葉童談情，問二人怎樣培養感情，二人笑說：「我們一直都有培養，好投入，好有默契，你感覺唔到咩！」又一輪大笑。
葉童說數月前接到導演袁立勳電話，「他找我有個理由，因女演員有男裝女裝有對比，導演覺得我適合。我喜歡現場，Live，觀眾可以感到張力，加上，莎士比亞這角色，知道找到Stephen做，吓，好特別，我知他是名人，好忙的人，好多事發生的話題人物，但不知他有興趣做舞台劇。」Stephen笑說：「你應該擔心我懂不懂做戲，哈……」其實Stephen在港大讀書時，已粉墨登場做過許多舞台劇，唯獨沒做過莎翁的劇目。