影帝黃秋生與視帝黎耀祥為無綫重頭劇《梟雄》，飛到上海拍攝外景，秋生雖然出發之初曾因機票及酒店房間有所不滿，但隨着經理人保證不用其貼錢而平息，整個拍攝過程跟拍檔祥仔、湯鎮業等合作甚為愉快，除了演技大較量，還鬥功架，不少動作場面，也不用替身上陣，拳來腳往。
說到今次上海外景安排，秋生笑說：「最後有房瞓，不用瞓街啦，跟成班演員好好傾，韋家雄又請食飯，之前阿湯（湯鎮業）還請大家食百幾隻大閘蟹，而祥仔就更加老友鬼鬼，好好傾。（但有指你不滿劇本？）沒有改劇本，只是梳理下個劇本。」
攞正牌躁狂罵人
今次主要在上海車礅取景，秋生跟祥仔及阿湯三大梟雄會反目成仇；日前拍攝一場煞科戲，秋生跟祥仔大打出手，雖然導演安排了替身，但當中拳腳之鬥，大量動作場面都由他們親身上陣，相當專業，及後秋生迫到祥仔到海邊，被槍傷的祥仔更要跌落水中。祥仔表示：「因為上海晚上都幾涼，水溫就更低，應該十度左右，我全身都要瞓落水，所以都冷，不過OK。（動作戲大部分都親身上陣？）除了有危險性，一般跟秋生的場口都自己做，拍出來效果會好些，兩個幾十歲都打得吓，你知秋生有功夫底子，有功架，他好多機會發揮吓。」外景初段，有指祥仔曾拉傷腰部，他說：「拉親肌肉，休息過後已經OK。」今次夥拍秋生，祥仔角色上也要「變陣」，以反派姿態出現，更要做漢奸。祥仔未有介意，還坦言過足奸人癮。「做得好人太多，今次角色真的過足癮，因為角色設定上我是一個好暴躁的人，講我在碼頭長大，之前給人打壓，所以粗聲粗氣，成日都可以鬧人，哈哈，可以將平時壓力抒發出來。」祥仔笑說。
真實世界中，祥仔甚少罵人，反而向來有話直說的秋生，被外界視為不易相處之輩；不過同劇的拍檔就力撐，阿湯指秋生只是大細路及有其態度而已。而祥仔則謂：「跟秋生合作沒有問題，因為跟（劉）青雲好朋友，所以早年已相識，我不覺得他難相處，當然啦，他對工作、事物都是一個有要求、有自己意見的人，都是提出解決方法，我跟他還好好傾，經常在未埋位時，傾好多偈，他會講吓去內地拍戲的事，講飲講食講戲，什麼話題都談談。」
今次上海外景之旅，一班演員當然沒有錯過大閘蟹宴，祥仔足足肥了五、 六磅回港。「沒有辦法，實在太美味，成班一齊食高興嘛，今個月就要演出舞台劇，但實在忍不到口，食了兩餐大閘蟹，極速增磅，唯有在這星期急急減磅，做運動keep fit啦。」●