韓國男團SUPER JUNIOR（SJ），上周六（19日）一連兩晚在亞博開騷，今次巡唱《SUPER JUNIOR WORLD TOUR – SUPER SHOW 9:ROAD》是SJ第九回的演唱會，由今年7月15日開始在首爾啟動，接連十個站演出。繼香港站兩場後，今晚（25日）正式在台北開3場，下一站到菲律濱，明年3月攻進日本西武巨蛋。等了3年疫後通關，演唱會復甦，SJ巡唱掘金之旅亦告展開。
今次SJ演出陣容有八子崔始源、利特、藝聲、圭賢、神童、銀赫、東海和厲旭，獨缺希澈，早前官方已宣布他因身體狀況，不能參與演出。今次香港站的門票，最貴價$1880一張，優先訂票被秒殺，兩場演出爆滿，可見SJ的魅力。
八子在周日（20日）尾場炸爆亞博，又唱又跳三粒鐘。尾場演出在下午5時準時開騷，以《Burn The Floor》揭開序幕，成員大玩手燈舞，跟住《The Crown》的火燒visual，震撼效果十足！連唱七首快歌，當唱完《Mystery》之後，八子先有機會同觀眾打招呼同傾偈。入鄉隨俗，先嚟「Hi Hi Hong Kong 」打招呼，最搞笑是東海話：「大家好，我哋今日更加靚仔 ！fans都比尋日靚仔，唔好話俾大家（昨晚觀眾）聽！」跟手俾飛吻、心心；再到始源就大曬「煲冬瓜」，然後用廣東話講：「你哋係我嘅心肝寶貝！」然後連環做出派心心、俾愛、摸面等甫士，冧死現場觀眾！
「俾機會我哋一齊老去」
在頭場（19日）演出時，演唱會至一半，成員就開始玩始源，問他點解今次唔除衫？始源笑道：「我今日完咗之後唔食飯！我再想想……」大家即問他，「咁係咪即係聽日除呀？」始源笑說：「我哋係咪合約簽明我要除㗎？」然後始源又再被隊友笑問，「你諗諗吖，門票價30萬won㗎！」跟手神童走去揭起始源件衫，即引來全場哄動，尖叫聲震烈亞博；而在尾場，利特在唱《Bonamana》時更跳得忘形，掀開恤衫曬出結實胸肌和腹肌狂跳，又引來粉絲尖叫。
成軍17年，這次慶祝第九回演唱會，整個演出rundown融合了音樂、表演、化學和VCR所有元素，加上華麗舞台感，演唱會主打歌《Mango》在舞台上首度演出，SUPER JUNIOR更是連MV中的服裝都原樣現身；當唱到《BLACK SUIT 》和《SORRY SORRY》等大熱歌曲時，全場跟住又唱又跳，成為時晚高潮。
全程勁歌熱舞，去到臨尾ending，八子同現場觀眾傾心事，難得在一輪勁歌熱舞後出現的感性時刻，神童說：「17年了，係你哋養大我哋，冇呢啲藍色嘅燈，我哋依家都唔知會去咗邊！」然後更催淚地說：「俾機會我哋一齊老去！」不過話鋒一轉，即變搞笑：「12月我開始會做運動，不過唔會減肥！」一直是「肥仔潛力股」的神童，一番說話感性與搞笑兼備。最後八子唱出《Happiness》完美收場，三粒鐘交足貨。
