樂隊Supper Moment主音Sunny（陳仕燊）去年9月宣布向圈外女友Emily求婚成功，二人噚日係教堂舉行婚禮，正式結為夫婦。
Sunny昨晚喺IG同大家分享呢個人生重要時刻，大曬結婚相放閃，一張係佢同新娘拖手一齊望鏡頭笑，而另一張係一對新人在教堂大門前Kiss，仲留言話：「執手開始一輩子的旅程」。鄭欣宜、李幸倪（Gin Lee）、林欣彤同馮允謙等藝人都有係Po下面留言送上祝福。
Supper Moment隊友都有出席婚禮，仲upload咗Sunny嘅結婚相，送上祝福。結他手阿雞（梁燿鵬）係IG post咗Supper Moment四人合照，恭喜隊友新婚，「兄弟，恭喜你同Emily今日終於正式拉埋天窗。」，分享Sunny嘅轉變，由以前覆句SMS都嫌麻煩，到而家能夠籌備整個婚禮。仲為咗另一半上婚前培育課程，組織自己嘅家庭「深深體會你對尋找幸福嘅熱情」。
至於低音結他手CK（張祖光）恭喜之餘更有爆料，大爆Sunny由以前連插雪櫃電掣都唔識、換部電話都覺得煩，到而家學識做家務。仲笑Sunny「以後唔單止要交歌仲要交人」。
圖片來源：陳仕燊、張祖光、梁燿鵬＠Instagram
