鄧麗欣（Stephy）相隔十六年，昨晚（12日）重踏舞台舉行演唱會。昔日Cookies的隊友吳雨霏（Kary）、楊愛瑾（Miki）、區文詩、陳素瑩（Gloria）及何綺玲（Elaine）都有到場支持。有傳決裂7年的Kary和Miki更是傳不和後，首度一齊看騷，Angela在IG上載多張照片，包括與Stephy的合照和 5位隊友一起睇騷的自拍照。其中一張，Miki更搭住Kary膊頭，兩人笑得好開心，似乎已冰釋前嫌！
演唱會中，Stephy獻唱了多首耳熟能詳的作品，包括《姊妹淘》、《再見不是朋友》、《他不准我哭》、《藍鞋子》及《電燈膽》。Stephy感謝大家多年來的陪伴與支持，「今次個騷好似好特別咁，因為有太多嘢想講。對上次開騷已經十幾年前，幾多年就唔講，好敏感呢啲。但係今晚再可以喺呢個舞台唱歌俾大家聽，真係好多嘢想講，多謝大家成就咗我嘅任性，係只此一次嘅嘢。咁多年，大家都經歷好多嘢，起起跌跌開心唔開心，希望大家都可以淡然去面對，好好愛自己。我非常愛而家嘅自己，你哋愛唔愛我？」台下即瘋狂歡呼。
Stephy續說：「好多謝你哋冇放棄我，仲有好多朋友遠道而來，咁多年後我嘅朋友仲坐喺台下。」此時，台下大叫「Stephy唔好喊！」她接着說：「其實，我今日已經好叻，rehearsal嘅時候喊到七彩，今日已經好叻，喊咗一次啫。仲要揀埋嗰啲相（《姊妹淘》大銀幕播放的照片）搞喊自己，唔緊要啦，都預咗，好多謝你哋嚟陪我，好難忘嘅一晚。大家都成長咗好多，今次呢個故仔都係講成長，好多情緒、好多選擇，其實所有選擇都係自己而成，有好、有唔好，有時會後悔，但其實唔需要後悔，我相信每個都係最好嘅安排。」接着，Stephy送上《我未願意》，感謝台前幕後的單位和多年來的樂迷，「我知道大家好辛苦，成日唔知道我去咗邊，我又唔係成日update個IG，所以好多謝你哋，我仲係好鍾意唱歌嘅！希望你哋唔好離我太遠。」
Encore部分，Stephy笑指已經唱盡精心挑選的歌曲，看到台下有樂迷舉起歌詞，她即興清唱《Fantasy Tale》（電遊「跑Online」主題曲），讓樂迷大為驚喜。Stephy說：「點解你哋咁鍾意呢首歌？個個都鍾意打機。其實我啲歌唱到差唔多，咁今日我有五位姊妹嚟咗，雖然唔齊人，但係好開心見到你哋。」台下即大叫「Cookies！」最後，Stephy帶來Cookies的《最後一塊》，成為整晚最大的驚喜。
相片來源：大會提供，區文詩@Instagram