陳奕迅《Fear and Dreams演唱會》，昨晚（14日）來到第五場，因為觀眾超級熱情如火，Eason愈唱愈勇，全場歡呼聲不斷，一到唱快歌，觀眾已不理全場站立呼叫，開晒電話燈滿天星海為他打氣，被觀眾愛意感動到Eason安歌時，滿眼雙紅忍着淚唱《K歌之王》，返落台底一度要冷靜一會才能回復情緒。
每晚觀眾的熱情，都令Eason愈唱愈投入，單是《黑夜不再來》，他已經唱了五個不同版本，令觀眾讚嘆不已。昨晚全場歌迷熱烈萬分，搞到Eason也差點忘記歌詞唱不下去，為答謝大家，Eason不斷爬上舞台最高位跟山頂朋友打招呼，「我聽到你哋話想望真啲 ，我都想望真啲大家！」唱到《七百年後》Eason「落山」，差點於高樓梯叉錯腳，幸好及時平行回來，笑住同觀眾講，「你哋真係太勁，搞到我都亂晒呀！真係！哈哈哈！」
來到一口氣29首歌後的talk位，Eason笑道，「你哋真係好勁！我想問下大家會唔會每晚上網喺度搜尋個騷有咩睇？」觀眾答：「睇呀！晚晚睇！」Eason：「我就唔睇嘅， 唔怪之得你個樣咁攰啦！哈哈哈……其實最緊要係咩？最緊要係依家！Now！咁早知幾冇癮……」觀眾歡呼大叫：「唔會呀……」Eason先笑住話:「知喇知喇，2D、3D唔同嘛，咁剩係睇Encore囉，Encore可以睇，因為每晚唔同嘛，我聽講，哈哈哈……」
繼而他又返回舞台樂隊位拿酒精噴手，仲作狀噴口，「唔知點解呢，幾年慣咗呢樣嘢，75 %酒精！我醉喇……」逗得觀眾十分歡樂，然後他想靜下來諗想講咩，觀眾又狂叫，Eason就忍不住說，「我明喇，我知你哋點解一定要叫，原來真係忍唔到！我都好想近啲大家，好可惜我唔係做緊子華神talk show，有時我真係要好集中，但係隔住個耳機睇到你哋個口郁郁下喺度叫，搞到我都失魂落魄喇，多謝你哋特登搶飛入場， 花時間大家可以聚下。」
接着他又忽然間問觀眾，「你哋入場仲有冇『嘟』入嚟？」觀眾答：「唔使『嘟』啦！」他才醒起：「係喎，依家剩係『嘟』針卡……有冇一個唔慣心態？做咩唔『嘟』我，『 嘟』啦……哈哈！」引得全場大笑，之後再話：「其實，『嘟』唔『嘟』都好啦，有啲嘢慣咗啦！即係好似我唔出聲，就有人會無端端即刻大叫EEEEEEE神！咁鍾意叫，嚟啦！一齊起身，再大叫啦。」
昨晚安歌環節，Eason選唱了《K歌之王》，全場音樂響起已為之瘋狂，七千人一齊大合唱！Eason唱幾句已經明顯滿眼通紅，一直強忍淚水，要求自己好好唱完整首歌；而自從他每晚安歌歌單不同，歌迷、網民已經掀起「估E神安歌唱咩歌遊戲」，不斷留言給他「係咪唱呢首？」，亦有聰明歌迷已經猜到，其實，Eason安歌歌單是由他出道的年份開始選，每年所有推出歌曲之中，選唱一首。Eason就話:「等大家估下啦，唔開估住……人有些期待、有些意外（驚喜），咁人生先會開心！哈哈！」
