今日（19日）DSE放榜，炎明熹、英皇男歌手黃明德與應屆港姐候選6號佳麗胡睿涵（Hanna）均為應屆考生。Hanna身在越南為港姐拍外景，坦言DSE放榜前一晚瞓唔着：「今日又有大型表演，同埋又出DSE成績，心情勁緊張。」問到如何知道DSE結果？她說：「係老師話俾我聽，佢睇咗成績就Send張相俾我。所以今日一直都睇住手機，睇吓老師幾時發信息俾我。」
問到對DSE成績滿唔滿意？Hanna坦言：「其實都係我理想嘅成績，我成績一向都好穩陣，唔係極好但又唔係太差。」問到最滿意的一科？她說：「視覺藝術，成績比預期高咗。」問到學業上的安排？她說：「都會繼續讀，睇吓考唔考到心儀大學。」
黃明德今早領取成績單，對自己的成績喜出望外，他說：「我成績係18分，best 5，全部加埋係20分，本身諗住自己係15、16分，諗住大專駁上去，但出嚟成績係over咗我嘅expectation，我係夠18分，其實係可以報讀好多嘅大學degree課程，所以好開心。」
黃明德表示最驚喜中文作文有5分：「拉到我成個中文有4，呢個係我最surprise，因為我冇諗過我語文科可以攞到4。我本身冇諗過報讀大學jupus，諗住駁上去讀歷史系，但頭先同咗好多老師傾過，就覺得其實應該放棄讀歷史系，或者第時入到大學專科，咁就揀咗個degree讀先。」
至於不在港的炎明熹未有回校取成績單，不過她曾表示考試沒想像中大壓力，無論成績如何都給自己5粒星。
