由模特兒、拍真人騷，再拍劇「入屋」的魏浚笙Jeffrey，去年大學畢業，宣布正式入行，與女友繼續「情侶檔」經營自己的幕前事業，雖然工作不斷，但對於簽公司仍心大心細。
這或多或少與Jeffrey的性格有關，不喜歡轉變，安分守己，「入行兩年，我覺得自己好幸運，我覺得只要做足準備，有機會就上，機會未到便好好裝備自己，從不刻意強求一些不屬於自己的東西。」
在剛播完的《I SWIM》，雖然評語好壞參半，但魏浚笙Jeffrey的表現亮眼，加上角色討好，為了這個角色，Jeffrey試鏡後未被通知選中，他已經預先準備，「我記得是去年二月試鏡，當時話六月才有結果，但三月的時候，覺得再唔郁就趕唔切，不可以在一、兩個月內操fit，所以未入選便開始健身訓練，如果中我的話，馬上就可以ready，點知到七月演員fitting，因為要試泳褲，嘩！發覺仲係咁肥嘅？原來只是自己覺得好大隻，但女朋友最清楚，她叫我放鬆唔好谷，如果都有肌肉才是成功。」
幸好劇集先拍攝文戲，「我在屋企不穿衣服，女朋友會突擊影我，之後會話：『你睇吓你，仲係豬咁！』幾好嘅，睇返相再鞭策自己，原本一日操個半鐘，變一日操兩個半鐘，到九月中，連導演都嘩了出來，我自己覺得啦，有些似美國隊長，哈哈！」
要穿著泳褲拍攝，信心比演技更重要，Jeffrey說：「要好投入角色，一行出來就要覺得自己好大隻，同自己講我係『The Rock』，行路都要型到癲，因為真係要對自己有自信，先可以除衫周圍走，片場除了演員導演，仲有好多女仔，咁多人望住你，私私縮縮仲核凸。」
客串《IT狗》後，Jeffrey發覺自己對演戲有興趣，開始上演技課程，「自從我上課之後，發現睇戲和以前不同了，以前睇劇情好睇就算數，現在睇完，會諗演員為什麼要這樣演？好多東西都不會寫在劇本裏，要靠演員自己諗，角色人物性格，都要做出來自然，好有趣。」與盧瀚霆Anson Lo合演的《百萬同居計劃》，在MIRROR開騷前已煞科，是Jeffrey第二套擔正的劇集，有指角色本來是由Edan呂爵安演出，問Jeffrey會否介意「執二攤」？他就大方咁話：「我唔介意，反而介意Edan的感受，所以我有問Edan這個安排，你介唔介意？如果介意我就唔拍。」Edan叫他不用想太多，有機會就去，Jeffrey說：「畢業一年、入行兩年，我覺得自己好幸運，可以試到很多東西，綜藝、演戲很多機會，好滿足，在這一行我不會想太多，我相信是個天要你點行，只要做足準備，有機會就上，機會未到便好好裝備自己，從不刻意強求一些不屬於自己的東西；有時你好介意、好想達到某個目標的時候，根本個機會未必是你，隨心啦！」
Jeffrey笑言自己是「燈神」，「每次對自己好有信心，通常都失敗，在《膠戰》經常發生，好似試完鏡，中就中，唔中就下一次再努力，我是一個知足常樂的人，平平凡凡，不用太多目標，更加沒有想要去到什麼位置？只要我享受當下，開心地做自己的工作已經好滿足，好多人連工作都不開心，但無奈工作佔人生好多時間，咁點算？要長期在一個不開心的狀態好辛苦，現在的世界已經十分複雜，又加上疫情，一定要夠正面，要開心地生存。」
攝影（花絮）：洪志富
化妝：Lauren Lee
髮型：Holam Chong @holamhairdo
形象：Daniel Chan
協力：Kary Leung
服裝︰VERSACE、PRADA、LOEWE、BALENCIAGA 、GUCCI
