《延禧攻略》令中港台觀眾看得入迷，就算劇集在大陸播完，大家都念念不忘，網上仲興起改圖熱潮，男女藝人紛紛將自己張相改成劇中人物，阿Bob同祖藍不約而同分享一張清朝妃嬪相，相中人同佢哋五官、氣質都似到十足十，兩人仲留言話如果《延禧攻略》開續集，冇理由唔搵佢哋拍囉！
呢兩個妃嬪大有來頭，右邊靚啲嗰個，似祖藍前世的，就是大名鼎鼎的珍妃，大戲都有做《光緒皇夜祭珍妃》，係光緒皇的至愛，估唔到同祖藍似得咁緊要，珍妃得寵但奶奶慈禧就好憎呢個「新抱」，八國聯軍打到北京時，奶奶走佬趁機叫太監將珍妃塞落個井度整死佢，去除眼中釘。
如果大家有機會去北京故宮的話，其中一個景點就是「珍紀井」，又名「胭脂井」，相傳珍妃被塞落井時，佢個櫻桃紅唇沿住井邊直落被擦損，留下一道紅色唇印，真係夠晒凄美。
一個靚一個唔靚，左邊肥嘟嘟似阿Bob嗰位，就是是珍妃的親姊瑾妃，珍妃排第五佢排第四，兩姊妹同一個老竇，但個樣差好遠，一齊嫁俾皇帝仔光緒，可想而知邊個得寵；據講瑾妃雖然唔靚，但性格溫純，就算被冷落都冇所謂，平時鍾意畫畫和美食，所以食到肥肥白白，珍妃得罪慈禧被監禁，佢都冇受牽連保有自由，慈禧走佬時仲帶埋佢一齊走。
光緒死後由溥儀上位，瑾妃地位不變好受尊重，佢鍾意食嘢又鑽研美食之道，永和宮的小膳房是出名的美食烹飪小館，佢煮咗好嘢又經常請人食，所以好多王公舊臣都鍾意食佢賞的菜。珍妃死時二十四歲，瑾妃在宮中安安穩穩活到五十二歲。
圖片來源：王祖藍、林盛斌@Facebook