今日28歲生日的盧瀚霆（Anson Lo），近日忙於拍攝新劇以及排練個人演唱會，但他仍抽空快閃出席後援會舉辦的慶生活動。後援會籌備一連串的慈善活動，其中在Asnon Lo今日生日，贊助約700名來自庭恩兒童中心的小童及家長，免費暢遊香港迪士尼樂園，全港市民還可免費乘坐天星小輪往返尖沙咀至中環、免費乘搭摩天輪、免費雪糕。
約下午5時許，Anson Lo快閃摩天輪現場，親身答謝「神徒」的支持，場內逾千名fans，場外亦約過萬fans圍觀，Fans人龍排到七號碼頭。Anson Lo現身一刻氣氛高漲，他亦與父母合照慶祝生日：「我知道跟隨住Anson Lo係有啲累，feel到大家會倦、感吃力，你們或有失望時候，是我做得唔好！」台下神徒立即打氣大叫「你好好」，令Anson Lo感觸落淚。他表示神徒不時提自己不用衝太快，「我停低腳步時你哋會一齊停，我想衝時你會同我一齊衝，不斷提我唔使逼得咁緊，因為我嘅性格好多時喺屋企睇到你哋嘅訊息，我都會係依家咁感觸。」
後援會送上生日蛋糕為壽星祝賀，台下逾千人齊唱生日歌，Anson Lo頻頻點頭讚好，之後他又與全場神徒大合照，期間不停同Fans報告近況：「我地係咪好少咁傾偈，我想劇透吓，呢啲係你哋最鍾意聽嘅！演唱會前我會出多一首新歌，呢首慢歌係我最鍾意嘅，而11月都會拍新嘅電影。」