鍾嘉欣近日回港除咗工作及商演外，更把握機會同老友聚會。嘉欣BB於圈中人緣甚佳，早前分別與《華麗轉身》同《溏心風暴》嘅演員見面後，噚晚佢就帶埋囝囝Jared與一班「處女黨」姊妹聚會。
嘉欣於社交網分享合照，並表示同閨密見面後，心境都即刻變年輕；而苟姑娘就留言：「屬於姊妹之間的小浪漫，一起走一段溫馨的路！」原來，佢哋唔再留喺屋企或餐廳食飯，王君馨（Grace）笑言今次好放縱，一班姊妹齊齊去行街，完全唔怕被人認到！仲話如果有套電影叫「媽媽特工」，可以考慮搵她們演出。
另外，嘉欣亦帶埋一對仔女同馬浚偉（馬仔）聚會，見馬仔與可愛嘅Kelly相當老友， 二人玩得非常開心；馬仔又抱起Jared，露出慈父笑容。
嘉欣與馬仔感情深厚，留言大讚對方：「呢個係位好特別嘅男人，我哋並無血緣關係。我哋曾經合作拍攝5部電視劇，但佢從來唔要求任何回報。當我遇到不公平待遇時，佢總會為我挺身而出。佢人品好、溫柔、有正義感、聰明，仲係一個好好嘅朋友，對我嚟講就好似哥哥一樣。」
圖片來源：鍾嘉欣@Instagram