梁小冰相隔廿六年再回TVB拍《逆天奇案2》，更與老公陳嘉輝相隔廿三年再合作飾演一對！昨晚（17日）播出的一集，歷盡不幸的阿蘭（梁小冰飾）最終接受徐仁達（陳嘉輝飾）追求譜黃昏戀。
講到與老公再度合作，小冰笑言兩人默契依舊，並笑言全靠有嘉輝哥做拍檔：「我哋會喺屋企對好晒啲對白，但唔會排戲，因為到現場先演會撞到個火花出嚟。我好多謝佢，佢係睇住你嘅情緒再去交對白，例如會睇住你啲眼淚流晒落嚟，佢先去下一Part（對白），冇一個拍檔係可以事隔咁多年個默契都仲可以喺度。」
小冰又大讚老公專業：「佢好有紀律，唔止準時仲會早到，所有對白都記到滾瓜爛熟，同埋佢係一個好好先生，唔鍾意同人鬧交，同所有人都交流得好好。」小冰笑謂與嘉輝哥合作過的女演員都有讚冇彈：「好似鍾嘉欣、蘇玉華、陳瀅、反琪（蔣家旻）佢哋見到我，都會話你老公好正，真係一個好好嘅對手，我真係覺得好幸福。」
嘉輝哥在劇中是一位癡心情長劍、對阿蘭呵護備至，現實中嘉輝哥亦同樣是絕世好男人加愛妻號，小冰受訪時開心分享嘉輝哥每日「冧豬語錄」：「我老公好玩得，每日起身都會話：『你好靚喎』，結婚廿幾年都係咁，講嘢好甜，就算我捲到個頭好似包租婆咁，佢都話：『點解可以咁靚』。」小冰坦言兩人亦有鬧交時，但嘉輝哥僅以一招便能成功收服老婆，「我性格係一有問題就會blablabla講晒出嚟，佢就叫我慢慢講、唔好嬲，同埋叫我可以選擇用另一種方式（表達），例如喺最嬲時唔好講嘢，寫出嚟。以前我就寫晒喺張紙上，寫完幾千字都已經唔嬲啦，依家就轉用WhatsApp。」小冰笑謂兩人結婚多年，現在已經是無聲勝有聲，「依家唔使講嘢都知大家諗咩㗎喇，唔使咁多說話同溝通，呢個就係默契！」
講到劇中差不多由頭喊到落尾，小冰說：「差唔多全部一Take過，最主要係入片場時已經進入個情緒，一個演員必須具備嘅技能就係共情，咁樣你先可以代入到個角色，有好多嘢你冇可能現實生活上經歷到，做演員好玩就係呢啲囉！」
