唔少粉絲為咗追星，會作出好多瘋狂嘅行為，甚至過份到跟蹤偶像回家。而近年積極於內地發展嘅關智斌（Kenny），憑住一身弗爆肌肉以及俊朗外形，得到大批女粉絲喜愛。
不過，Kenny今日（2日）就發文指遭到一名女狂迷騷擾，Kenny貼出閉路電視截圖，指被對方騷擾近半年，日前更闖進其住所。
Kenny於社交網寫道：「在星期二的晚上，大約晚上11點多的時候正準備休息的時候，突然間收到保安員通知，有一位穿着紅色衣服、拖着行李箱和說着國語的女士，出現在我大廈的門口，並且利用保安電話聯絡我和我的鄰居，意圖闖入電梯大堂，幸得盡責的屋苑保安人員阻止。」佢無奈表示今次已經唔係第一次發生。
Kenny又話呢半年間，佢喺社交平台一直都收到該名女士嘅留言及圖片，而內容帶住莫名奇妙嘅想像同威脅性嘅語氣。對方更查獲好多Kenny嘅個人資料，地址、電話號碼、通訊帳號等，令Kenny非常困擾，迫使佢慌忙更改個人資料，甚至連手機都要更換。
飽受嘅騷擾嘅Kenny，希望女狂迷可以收斂自己嘅行為：「希望這位女士會自覺地收斂自己的行為，我想鄭重地跟你說，你的恐怖行為已經令我深深感到困擾，我開始擔心自己的人身安全。我甚至擔心不知道你會不會有一天成功混入我的居住範圍；又或者當我在公開場合工作的時候，你會躲在一個什麼角落、甚至你會不會傷害到我…..」Kenny坦言呢啲困擾，已經開始影響到佢嘅情緒同日常工作，並向對方表示自己生活中亦一位普通人。
最後，Kenny表示保安人員已把相關閉路電視片段保存，又將狂迷所有嘅留言都截圖備份。佢再三希望對方可以停止騷擾行為，若有情況再度發生必定報警處理。
圖片來源：關智斌@Instagram