噚日爆出嘅「安仔出軌事件」轟動全城，黃心穎與許志安（安仔）兩人更引起公憤，形象直插谷底。男方噚晚即急開記招認錯，當場鞠躬致歉，並宣布停工；女方則未有回應，只透過無綫電視高層樂易玲表示悔意。
一班怒火中燒嘅網民紛紛留言，要讓二人得到沉重嘅教訓，甚至認為「安心」應退出娛樂圈。兩位涉事主角嘅前途未明，安仔早前宣布於今年開演唱會，至今能否如期舉行亦未知之數；與黃心穎合作嘅藝人亦受牽連，正與黃拍攝新節目《懿想得到》嘅黎諾懿，呢兩日亦受大量網民警剔，要小心女方。
而黃心穎近年有意發展歌唱事業，早前更爭取到機會為無綫熱播劇集，《愛回家．開心速遞》唱主題曲《在心中》。
不過，事件發生後，唔少觀眾話會待主題曲播完才收看該劇，甚至揚言會罷睇《愛回家》，有傳今晚劇集將抽起主題曲，改播純音樂。
另外，黃心穎之新劇亦播映無期，其有份演出嘅《堅離地愛堅離地》，原來定接檔《鐵探》於下個月播出，如今無綫決定抽調該劇，改為播映由楊明、高海寧、湯洛雯、陸永等主演嘅《婚姻合伙人》。
圖片來源：互聯網、黃心穎、黎諾懿@Instagram