鄭裕玲（Do姐）一向鍾意追韓星，除咗熱捧孔劉與朴敘俊外，不時都會同好多男神Oppa合照，令一班妹豬好生羨慕。而韓國組合BTS（防彈少年團），噚晚喺香港舉行首場演唱會，原來Do姐亦係佢哋嘅粉絲，佢仲準備望遠鏡，以及帶埋BTS成員金泰亨嘅應援扇入場。
Do姐表示今次係佢第一次睇BTS演唱會，同一班「Girlfriends」追星，感到十分興奮。見佢同陸永大女陸一穎（Hannah）喺場外拎住入場票合照，表現得非常期待。Do姐仲話「友誼不被年齡限制」，無論幾多歲都會被BTS迷到。
而陸永並無阻止囡囡追星，甚至喺場外等完場：「兩位少女心梗係約埋入去睇BTS啦！一對中坑父母梗係喺場館外面等啦。多謝Do姐將咁珍貴嘅飛送咗俾hannah。Do姐打嚟話有飛請hannah嗰日爭啲喊出黎。」
佢知道Hannah睇得好開心，話等佢咁耐都值得，果然係廿四孝父母。
圖片來源：鄭裕玲、陸永@Instagram