早前情人節，張繼聰（阿聰）同老婆謝安琪（Kay）享受二人世界，更驚喜為愛妻自彈自唱《每天愛你多一些》，冧到阿Kay一直甜笑，幸福程度爆晒燈！
歌手出身嘅阿聰，而家投入演員工作，但閒時仍不忘玩下音樂。阿聰尋晚喺Instagram分享咗一條影片，並留言：「收工喺村口撞到兩名工友，見咁得閒，同佢哋jam咗成晚。」而一對寶貝仔女，就係阿聰最好嘅Band友。
囝囝張瞻遺傳咗父母嘅音樂細胞，佢隨手以屋企嘅日用品同爸爸「Jam歌」，音樂雖然簡單，但已令一家十分快樂。見張瞻節奏感十足，即興創作多個拍子嘅敲擊樂，兩父子玩得興起時，更將對方當鼓打；而妹妹張靖就隨住拍子擺動身體，又興奮自轉跳舞，非常可愛。
片見未見老婆阿Kay，原來佢為家人充當幕後攝影師，喺媽媽掌鏡下嘅影片果然充滿愛！有網民笑言「大會攝影師忍倒笑又唔手震好勁啊」，唔少人都大讚張家樂團充滿歡樂，如果媽媽加入唱歌就更完美。
圖片來源：張繼聰@Instagram