《復仇者聯盟3：無限之戰》開畫一周票房衝破八千六百萬，唔少觀眾睇完呢套十年巨作都好想即刻睇續集，第四集當然未有得睇，但嚟緊就有《死侍2》（5月16日）同《蟻俠2》（6月28日）緊接上映。而Marvel Studio 亦於日前發布最新《蟻俠2：黃蜂女現身》電影預告片，短短兩分鐘嘅片段已經窺看到黃蜂女到底有幾勁，今次仲擺明車馬搶男主角風頭。而家超級女英雄愈來愈多，黃蜂女仲係驚奇隊長（Captain Marvel）出場前拎大旗造勢，唔知黑寡婦之後會唔會開拍獨立電影，又或者嚟個女英雄掘起系列呢？
講番男主角蟻俠，佢係第一集電影已經施展神乎奇技，一時變大，一時變細，呢種能力拋離叮噹支放大縮小電筒好幾個身位。但《蟻俠2：黃蜂女現身》預告片一出，就知新角色黃蜂女能力比佢勁好幾倍，連蟻俠都講：「她似乎仲勁！」先唔講黃蜂女同蟻俠一樣有變大縮小能力，仲新增武器激光槍，淨係有對翼識飛已經甚有睇頭（終於唔洗好似蟻俠咁騎其他識飛昆蟲先可以埋敵人身喇）。
至於《蟻俠2：黃蜂女現身》電影主線應離不開講黃蜂女身世，同埋點聯手對抗敵人。另外，今次續集仲會出現反派女角色Ghost，角色能力就如幽靈般識穿牆，要捉住佢真身都唔慌易得去邊，睇嚟蟻俠同黃蜂女今次有排煩啦。
圖片來源：互聯網
影片來源：Marvel Studios Hong Kong@YouTube