看到欣宜在首個紅館騷《Break A Leg演唱會》中憶起亡母哭成淚人時，突然感到即使在香港生活逼人，在亞洲做女生很累人，幸好有個鄭欣宜給大家一點力量；在網絡 hate speech 氾濫的年代，萬箭穿心仍然未倒下。
翻看新聞才發現，欣宜當年那個「不再盲減肥」的宣言已是 4 年前的事。發佈這宣言當然需要勇氣，但 4 年仍然堅持「不要將自己快樂放在你的身形上」更加難。這些年，一直間中聽到身邊朋友悄悄的說，欣宜這種態度叫人不好意思直接指罵，還要經常「消費亡母」，其實根本是拿藉口給自己「耍賴」，就是不信節制一點還是會那麼肥吧！
你大可以說欣宜含住金鎖匙出世，曾大言不慚話自己因為鍾意去 shopping 所以叫 Joyce，可以覺得自己跑步個樣唔出得街而買部跑步機返屋企練跑減肥；但其實亦因為咁，她要承受的壓力遠比常人多。長期活於鏡頭前，a camera adds ten pounds 無呃你，早前《絕望主婦》的 Eva Longoria 腹大便便上清談節目也笑稱多年來稍為增磅已掀起懷孕傳聞，今次真的懷孕了，卻被指中年發福，令她哭笑不得，老實講，做女藝人真係落街買麵包都心驚膽跳啦。
欣宜不單從沒避開旁人抨擊，願意直接面對「問題」，一首《女神》緊接《你瘦夠了嗎？》，唱埋出嚟答返你。昨晚在台上唱着《命硬》時讀出「結果我共你 仍然逃不出被圍攻 被捨棄」的歌詞，表示「一直以嚟我都畀人批評，但係我冇放棄，就算我係負分都好，只要我夠堅持同努力，總有一日我可以由負分上返去零分，再一分一分加上去，我深信只要堅持同努力，總有一天我會合格。」
跟欣宜最老友嘅許廷鏗上載在後台擁抱嘅相，除了「係愛呀哈利」之外真係冇嘢好講。
其實看着她籌備這次演唱會，也能感受到她散發的正能量。先是去年底在旅行時樂極生悲弄傷腳掌，在醫院爆喊驚影響演出，但化悲憤為力量將演唱會命名為《Break A Leg》雙重意思又幾幽默；演出前又露出少女心坦白話好希望著高踭鞋可以好睇啲，積極做物理治療見營養師做足準備，引來鄭秀文、梁詠琪等各方好友為她加油，足以顯示佢有幾抵錫。當你見到鄭欣宜都可以逆流而上，你會覺得點解你唔可以呢？
Sammi 、Gigi 都忍唔住為佢加油
連好耐冇見嘅媽媽 Kay 都出現撐場做嘉賓！