黎明演唱會《Leon黎明Talk & Sing 2021紅館演唱會》第三場邀請咗100毛腦細林日曦做嘉賓，雖然腦細最近忙緊舞台《大MK日》，但都趁住休息日同黎明一齊上紅館舞台，仲拖手仔合唱《但願不只是朋友》。
林日曦一上台全場觀眾都熱烈拍手歡迎，喺正式合唱前，二人大談金句，腦細更為Leon下個騷自薦節目名，「今次個演唱會叫『Talk＆Sing』，Talk比Sing前，代表Leon公開承認自己鍾意講嘢多過唱歌。我可唔可以要求Leon下次真係開talk 騷？為咗鼓勵你開Talk Show，我連名都幫你諗埋，今次叫做『Talk ＆ Sing』，下次叫做『Talk＆Talk』，淨係talk冇sing。」
林日曦講完「Talk＆Talk」，黎明都似乎冇咩反應，於是腦細再發功講落去，「佢好似唔係好鍾意Talk＆Talk，不如叫『情深金句未曾講』。佢又好似唔多鍾意，真係好難服侍。」講到呢隻，黎明終於大開金口：「其實個名幾好，不如我casual 啲，直接叫『夏日傾偈』！」
Talk完一輪，林日曦同Leon合唱之前又爆咗一段金句，「揀歌同揀朋友，最緊要真心。我睇返我哋之前拍廣告，踩單車嗰次，都算係初代大叔的愛，所以揀咗一首你嘅舊歌，你俾隻手我。 呢首歌代表我嘅心聲《但願不只是朋友》。」
圖片來源：林日曦＠Instagram
