上月約滿離巢無綫的黃智雯（Mandy），宣布正式加盟「凱藝娛樂」，成為朱茵與蔡少芬（Ada）的同門師妹。Mandy為新一年拍攝造型照，對於加盟新公司大叫興奮，表示抱正面開放態度，迎接新挑戰。
回首2023年，對Mandy來說的確是特別的一年，成為人妻，身份改變，亦因這個身份變化，令她深感要展開人生的新階段。她說：「好想突破自己，跳出框架，嘗試一啲以前未試過嘅嘢！我好想同多啲唔同嘅演員合作，多啲火花，對電影、綜藝節目、真人騷等所有嘢抱開放態度，以樂觀、開放，迎接新挑戰！」
對於兩位同門師姐，Mandy跟她們早有淵源：「我同Ada都係Miss HK出道，佢係我師姐；朱茵就係我演藝學院嘅師姐，非常期待將來我哋可以有更加多合作火花。」
老公和好姊妹對於Mandy的新動向亦給予支持，她指：「另一半好支持自己，一步一步走來，佢沿途都俾好多意見，我覺得佢係一個好聰明嘅人，成日都會幫我分析，亦係好好嘅聆聽者及心靈伙伴；姊妹們更加係唔使多講，我哋姊妹間無論大家有咩決定、有咩去向，都會在心中互相支持。」
