黃妍（Cath）耗時近兩年製作的最新專輯《4891》，以村上春樹《1Q84》作延伸創作，早前Cath在東京舉行日本站的展覽，為專輯作結，不少粉絲越洋追星外，亦有不懂中文的日本粉絲現身撐場，令Cath十分感動。Cath說：「當初我哋成個團隊好癡線，會諗如果最後一站可以去到東京作結，成件事就好圓滿，冇諗過成個團隊齊齊朝住呢個方向好努力策畫全部嘢，最後成真，感覺好夢幻。」不單只Cath好瘋狂，就連粉絲都一樣，追星到日本，她說：「粉絲要請假、買機票自己飛去東京睇展覽、睇音樂會，參加Mini Tour，都曾一度懷疑會唔會真係有人去呢？見到好多人報名已經好神奇，報名後真係出現係好感動。」
Cath的展覽現場，除了擺放了香港展品外，亦有日本插畫師們的畫作，而展覽其中一日Cath更舉行了迷你音樂會，除了獻唱碟中全部作品如《反烏托邦三部曲》、《哀傷的作者》等，還唱了宇多田光《First Love》與Official鬍子男dism《Pretender》製作成的Medley。
當日除了香港粉絲外，亦有移居當地的香港人，以及日本粉絲到場。日本粉絲的出現，令Cath十分驚訝，她說：「真係有完全唔識中文嘅日本粉絲，喺Show前等咗個幾鐘，其中有位等到最後完埋個Show影相，冇諗過佢會拎住隻碟嚟俾我簽名，仲交流咗一陣有關呢隻碟嘅嘢，好開心！文化呢樣嘢係不分國籍，不分界限，當我哋好專注做呢件事，大家可以感受到，我哋做呢個Project嘅初衷係可以感染到其他人。」