馮允謙（Jay）日前舉行新碟分享會。他邀請了新碟創作團隊馬敬恆（T-Ma）、陳考威和周錫漢上台分享創作經過。主持人問陳考威和T-Ma，如何與Jay造歌時夾到好氣氛，順利完成？Jay突然自爆：「聽晒我話，咁我就easy going（好易話為）！」兩位嘉賓立即點頭，平時順得人的Jay，原來在錄音室霸氣急升，引起全場笑聲。
Jay透露日前練歌時，被歌詞感動流淚。他說：「我好緊張，因為第一次喺咁多人面前唱晒成隻碟嘅歌，我好在乎大家反應，希望大家鍾意。《在最好的時間做最好的你》係成隻碟嘅主題，噚日練歌嘅時候，我一唱完就喊。當時我幻想見到十一年前嘅Jay，呢段時間經歷咗好多事，每次聽呢首歌都好大感覺。」在錄音室錄歌時，Jay反而比較冷靜，他說：「錄歌嘅時候有感覺但無喊，因為當時身體開始有少少唔舒服，我好擔心自己病，影響進度，錄唔切就出唔到碟，好大影響，所以錄歌嘅時候雖然都好投入，但更專注唱得好唔好。而到最近練歌嘅時候就好投入，特別感動。」
碟內收錄了一首英文歌《You are my everything》，是《給你幸福 所以幸福》原形，這首歌一推出立即成為婚禮熱門歌，Jay說：「初頭唔係諗住寫結婚歌，呢首歌有啲特別，我最初寫Demo用英文填詞，一心諗住出英文歌，無諗有廣東話詞，後來出咗廣東話版本好受歡迎，好多謝大家咁鍾意。依家收錄喺碟嘅英文版本，係我原本嘅諗法和訊息。」