香港男子花劍代表吳諾弘（Lawrence），周日（26日）於香港公開劍擊錦標賽決賽以15比7擊敗楊子加，首度封王。
現年24歲童星出身的吳諾弘，當年為了成為全職運動員而放棄繼續學業，21年東奧拍住大師兄張小倫、「劍神」張家朗和蔡俊彥上場，首次出戰奧運的吳諾弘表現勇猛，被網民稱為「老虎仔」。人氣急升，私生活亦受到關注，最近被影到與新女友在港鐵拍拖，吳諾弘接受本刊訪問時承認新戀情︰「拍拖啫，又唔係做咗啲乜！」
吳諾弘自今年五月的上海大獎賽，至今右手一直受傷患所困，他說︰「其實現在都一直有痛嘅感覺，所以希望學識可以同個傷患共存，慢慢去習慣，以前有啲動作都會就住就住，依家都已經可以放開打，傷的位置是手指內側韌帶，其實好難完全根治。」在上月底的會長盃摘亞，吳諾弘走出低潮，今次香港公開賽更進一步，由亞軍變冠軍，贏得他生涯首個本地公開賽錦標，並袋走$8800獎金。
吳諾弘說會請一班師兄弟食飯，「我諗食飯係其中一part，剩低嘅都未諗到，未諗到點樣去用獎金。」有消息指香港將於2026年主辦世界錦標賽，吳諾弘興奮表示：「是對香港劍擊一個肯定，作為運動員感到非常鼓舞！」
回港後，吳諾弘於IG發長文公開多謝新女友︰「多謝教練隊友一直幫忙同鼓勵，多謝咁多位不論我打得好與否都繼續撐我，最後想多謝我父母同女朋友，其實嗰排真係我低潮期，我知道佢哋好擔心，所以想喺度講聲唔好意思，之前令到你哋擔心了，日後即使我打劍打成點，我都唔會再好似之前咁樣消沉落去，我OK的。開心過就準備迎接嚟緊一系列嘅世界賽，盡力打好我嘅每一分每一劍，希望大家可以一直支持我哋。出完post無咩事我都係返去瞓覺先，有咩就交俾聽日嘅我啦。」
吳諾弘解釋︰「之前受傷好多負面情緒，有同教練去傾去釋放，現在好多了。」與前度大學生女友分手後，吳諾弘現正與同門師妹、22歲劍擊花劍隊師妹關渝澄蜜運中，兩人屬同一個教練在體院受訓而日久生情，大家有共同目標和興趣，互相扶持，繼蔡俊彥和鄭曉為後，劍擊隊又多對一對小CP誕生。
從來不介意公開有另一半的吳諾弘，以前已不時po出女友合照，但早前被爆刪走所有合照，更互相unfollow。直到上月，吳諾弘被影到與長髮女子在港鐵車廂甜蜜互動，吳諾弘就表示︰「拍拖啫，又唔係做咗啲乜！唔想特別去交代呢個係我新女朋友，無端端上了封面，我哋自己圍內睇完咪得啖笑囉，最好笑係有人認得去偷影。」
吳諾弘六歲時做童星，拍攝超過30套無綫劇，直至15年離開演藝圈，專心劍擊發展，問他有沒有戲癮？吳諾弘說︰「冇乜！」不過，吳諾弘去年9月開設YouTube頻道拍片，內容包括與隊友玩小遊戲、學新運動項目，也有愛情短劇等等，他說︰「嗰個channel未必會繼續run落去了，因為真係冇時間，但之後會有一個新project，只係單方面做幕前，好似一個主持咁，相信會輕鬆很多，內容都係啲輕鬆短片，我比較喜歡同班朋友一齊玩下，不過，唔會以呢個為職業。」