關心妍（Jade）日前在廣州完成《約》22周年演唱會，全場爆滿之餘，囡囡更自薦做嘉賓！這次演唱會原定Jade出道20周年時舉行，但受疫情影響延至22周年舉行，但無阻歌迷熱情，來自內地的粉絲紛紛撲飛：「呢次廣州係第一站，嚟緊仲有幾站會舉行，因為延遲咗兩年，所以都加啲新衫、新歌單俾佢哋補數！今次香港fans都組團二百人嚟支持，我叫佢哋乘機去下啲大熱超市朝聖，其中一個fans更加喺日本趕返嚟睇騷。」
Jade久未舉行巡唱，今次一票難求，有哈爾濱樂迷南下捧場，到步後才發現全場爆滿：「我都唔知點算好，真係一張飛都冇晒，冇理由我哋自己買黃牛㗎嘛！但見佢咁遠嚟到都要諗下方法，最終我俾咗囡囡張飛佢，我同心心講佢係嘉賓，要喺後台準備，唔使門票嘅！啲fans見到佢都好開心，話佢高咗好多，唔知下次開騷，佢仲肯唔肯上台唱。」母女再度合唱成焦點，Jade亦帶新歌衫登場：「因為我剛剛簽咗新唱片公司，希望俾大家有新嘅感覺，加上心心都入咗小學，開始有返啲時間做嘢，所以都趁佢返學日子錄新歌，不過我同公司講好咗，要跟學校校曆表去安排工作。」