關心妍（Jade）今個月20日在紅館舉行《Shine妍亮福音慈善演唱會》，近日接受梁泰來主持的商台《星光背後》專訪，為演唱會宣傳。
跟去年出道20周年紀念演唱會比較，Jade強調這次絕非是Part2，她將聯同十個嘉賓單位演出，雖然只開一場，但製作成本並無減少，只得四個月時間籌備，坦言：「賣晒飛都要蝕！」可是，為了2015年成立的「妍亮生命慈善基金」及一眾受惠能免費入場的低收入家庭，Jade只好硬扛這次善舉，「是沒想過紅館檔期這麼快批出，諗過打退堂鼓，但最後不知那來的信心，自己首次像sales般周圍找朋友投資或支持。」
在去年20周年演唱會期間，Jade帶同6歲女兒楊榮心（心心）上台表演側手翻，這次囡囡同樣希望有機會演出，她表示心心遺傳了自己害羞的性格，同時發現其興趣亦不在音樂方面而是運動方面：「我覺得佢幾有運動天分㗎！有次佢突然話想攀石同翻筋斗，試完發現佢好鍾意之餘又完全唔驚，所以我後來就送咗佢去學柔軟體操。」心心年紀尚小，Jade仍未考慮是否培養她做接班人，希望她先多作嘗試再決定亦未遲，「最重要佢諗清楚選擇好就要努力去實踐。媽咪做歌手並唔等於佢都一定要做歌手，佢今日係因為媽咪歌手嘅身份被帶上台，而他日佢就係要靠自己嘅努力打出一片天先有上台嘅機會。」她亦強調囡囡假若真的想入行，必先完成學業，「你做咩都得，但書都一定要讀！呢行唔會一入行就有得大紅大紫，你要有一定嘅智慧同EQ去面對唔同經歷。」
另外，Jade又透露最近受到鄭秀文主演，圍繞寄養家庭的電影《流水落花》所影響，決定封肚不再生第二胎，打算待囡囡長大多一點，學懂如何照顧自己之後，就會計劃申請成為寄養家庭，「我希望如果我有咁嘅家庭資源，有咁嘅時間，不如去幫返香港一啲朋友過渡。」她的決定也得到心心的支持，因此大家都有共識一起去做。
