相隔六年，容祖兒再於演藝學院舉行共34場Side Track騷《ANOTHER SIDE…JOEY•MY SECRET•LIVE》；一如過往，祖兒在Side Track騷都會分享較多內心世界，今次大談感情外，亦趁機會向恩師羅文致敬。
開騷前，祖兒坦言已被歌迷的點歌訊息炸爆IG，第三場亦是繼歌迷會專場和AIA專場後，公開賣票的首場演出，早前祖兒自爆好姊妹阿Sa瘋狂做媒人後，這晚一出場，祖兒即被現場歌迷瘋狂求婚，「嫁俾我！」、「我娶你！」、「I MISS YOU BABY！」大家愈叫愈興奮，祖兒說：「今日好開心，我覺得今晚每次唱完歌的掌聲，是最多最豐富，我完全感受到大家每首歌都聽到入心，這些掌聲給我很多力量，唔只掌聲，仲有瘋狂呼叫聲，仲有瘋狂求婚，哈哈！」
雖然台下男觀眾瘋狂求婚，令祖兒忍不住反白眼和傻笑，不過祖兒最冧的時候，是望着台下捧場的媽媽、弟弟、弟婦及姪女Sophia，見到Sophia手舞足蹈，祖兒不禁甜笑，更叫Sophia向全場觀眾揮揮手打招呼；原來在綵排時，祖兒已讓姪女踏上舞台感受一下，更陪住Sophia行過彩色小山丘佈景，這位姑媽認真唔話得。
祖兒談到家人時，她坦言過去三、四年，令自己成長不少，「過去三年，我相信每個人都經歷好多，係全世界、全宇宙最難捱嘅時間，我呢個典型『裙腳女』，冇得返屋企真係好難捱，平時我喺出面點辛苦、點困難、點多挑戰，返到屋企飲碗湯就可以充電。前幾年要一個人喺出面獨立生活，工作家務都要一個人處理，唔洗衫就冇衫著，唔摺衫張梳化就冇晒位，唔吸塵腳板底就黑晒，為咗有家嘅感覺，連屋企用開隻洗衣液都買埋一樣，等我洗完衫覺得似喺屋企咁。」
Side Track騷分為七個部分，第一部分祖兒帶大家回到過去，分享小時侯的「SECRET」，接着帶歌迷返回校園上堂，祖兒談到小時侯校園的故事，笑中有淚。
第三部分「瞬間轉移」，十人大樂隊出場與祖兒一同勁歌熱舞，分享她平日於錄音室的最私密空間；之後祖兒分享不少感情世界，配合她親自揀選的歌單，今次精選26首歌曲，有些side track更是她首次在台上獻唱，包括《溶》、《渴望晨曦的女孩》、《一個人砌圖》、《我杯茶》、《候鳥樹》、《敬請留步》、《我好得閒》、《13點》等等；整個歌單，祖兒揀選唯一一首冠軍歌，她說：「我一個人聽住呢首歌跑步，自己都被自己感動到，滴咗兩滴眼淚，以往一直未有時間同大家分享呢首歌的感受，今日終於都可以，所以請容許我唱唯一一首唔係side track嘅冠軍歌《東京人壽》；人生路上，堅持下去，咬實牙關，所有事都會過，多謝大家咁鐘意呢首歌，冇上電台冇宣傳，舊年一派歌就成為冠軍歌。」
每次舉行演唱會，祖兒也會在一些小細節懷念恩師羅文，加上去年是羅文逝世20周年，今次音樂總監何秉舜把羅文的歌曲《Just For You》重新編曲，將祖兒經典歌的歌詞置入，獻給羅文，祖兒說：「音樂對我來說非常重要，陪伴我渡過好多脆弱時間，細細個好鐘意王菲、黎明大家都知，好多流行曲俾咗我養分，多謝每位在我人生中出現過的音樂夥伴，希望日後我可以繼續為大家提供更多好歌，陪伴大家最好時光。 」
祖兒在場館外擺放了一個小屋信箱，每位入場觀眾都可以點唱，演唱會最後由祖兒即場抽出，她笑說：「唔唱好似大家過唔到人世咁！」這晚祖兒先抽出《小天使》，但由於前兩晚已唱過，歌迷要求重抽，祖兒這晚「賣大包」，「今晚咁好氣氛，本來抽一首，而家抽三首！」之後抽出《零時零分》，以及早前阿Sa點唱過的《去火星戀愛》，另外還有較新的Side Track《不配》，完場前，還有連串Medley，大家最期待的《ANOTHER SIDE MEDLEY》曝光，歌曲包括：《損友》、《密友》、《分身術》、《為你萬歲》、《一拍兩散》和《早有預謀》。
完場前，歌迷為祖兒準備了一個幾層高的生日蛋糕，補祝她六月生日；而餘下的場數，據知亦有神秘歌單，祖兒提醒歌迷要準時入場，「演藝學院睇騷有規定，開咗場就要等到中場休息先可以再入返去，所以大家千萬唔好遲到，而現場裏面係唔可以影相同錄影，大家安心放下手機，好好欣賞節目，到最後的環節，已經同場地方面講好咗，到時我會話俾大家知，可以影相留念啦！到時大家先拿部手機出來。」
