由鄧小巧主理的網上歌唱節目《Singaholic》來到第三集，這集請來泳兒（Vincy）任嘉賓，節目中二人除了互唱對方的歌，傾偈時更笑料不斷。節目一開始，小巧十分「乖巧地」向Vincy問好：「師姐你好。」Vincy聞「師姐」二字即大笑：「喂，好怪呀呢件事。」小巧便解說因為自己是最新加入公司的藝人，所以「叫每一個人都係師兄師姐。」泳兒跟小巧是公認的實力唱將，不過Vincy坦言從來沒想過當歌手，只是一直都很喜歡唱歌。小巧則相反，打從小時候便幻想當歌手是一件很夢幻的事，她更是因為孫燕姿而入行，「好記得佢個『綠光演唱會』，我係睇video，覺得點解呢個人做歌手做得咁瀟灑嘅？佢有別於一般當時歌手嘅感覺。我覺得：『咦？好想好似佢咁樣。』」
小巧分享成為歌手後在一次活動上見到孫燕姿的經歷，「當時準備出我第二隻EP，我真係好想好想有機會見到佢，將隻唱片交俾佢，好想同佢表達我因為佢而咁希望成為一個歌手呢件事。跟住我見到佢，我係咁樣：『我嗚嗚……』完全講唔到嘢。由於孫燕姿已經係一個天后咗好耐嘅人，所以佢見到我呢啲咁嘅瘋癲嘅歌迷，佢好冷靜。同埋佢當時係身懷六甲，所以佢有啲係『嗯……嗯……』哈哈！但我就係好激動。」那次孫燕姿事件後，她再見到自己的歌迷，已很接受歌迷對她做任何事，「我自己都失心瘋咁樣，哈哈。」分享完自己瘀事，輪到Vincy自爆，「有一次發生咗一件好唔開心嘅事，喊到我覺得個靈魂都飛走咗。然後我揸車去錄音，錄完音返屋企，瞓醒第二朝就想攞車，跟住我發覺我架車唔見咗！我第一下好嬲，『搞錯！我已經咁黑仔！仲要架車俾人偷咗！』即刻想打去管理處鬧，但突然間，『係喎，琴日好似泊咗喺錄音室附近。』我嗰晚走嘅時候係call車走，我完全唔記得咗，我覺得係我心情差到一個點，我連架車都可以捨棄咗！哈哈！但我以為架車俾人偷咗，哈哈！」
隨後小巧問：「有冇人知道我哋公司嘅藝人一啲𤓓嘢？」Vincy︰「大家平時嗌人，會拍吓佢手臂：『喂，小巧。』呢個人，因為佢係一座山咁高，佢好鍾意同我傾偈，但佢就唔知道自己好高，成日拉我嘅時候就拉咗我『格肋底』，哈哈！佢會成日拉住我：『Vincy你過嚟我同你傾吓偈。』跟住我就會俾佢扯走咗，哈哈！新人嚟嘅，Aiden呀！」不過小巧還未見過這位「師兄」，更對Vincy說：「我同你差唔多高啫，我160cm。」Vincy接着說：「我159cm。」小巧頓時醒覺，「哦，咁佢都會抽我格肋底喎，哈哈！有汗點算呢，哈哈，佢會話：『你個格肋底濕嘅師姐。』」Vincy立即反應，「咁我都乾爽嘅，哈哈！」說完這句後，二人大笑到喘不過氣來。