鄧小巧的網上唱歌節目《Singaholic》昨晚（28日）播出第四集，今集找來同樣唱得的李幸倪（Gin Lee）任嘉賓。 節目傳統是邊唱歌吹水邊淺嚐美酒，不過由於Gin Lee在出道前的一個表演中，因表演前喝了點酒，令表演失準，從此她show前都滴酒不沾，自言那次十分大鑊，「我比較少飲酒，未出道時喺一個wedding上唱歌，通常玩兩個set，set與set之間就休息，同班musician傾下偈，見到啲賓客咁開心，我都跟大隊飲一啖參與下。飲咗一啖之後就話要上台唱歌，intro我諗玩咗八十個bar都有，我都入唔到！真係冇試過咁樣，好驚，之後就驚咗啦。」
小巧則透露自己不可以溝酒，她憶述初次認識陳詠謙便被邀請到他家中作客，她的記憶只是最初眾人以紅、白酒熱身，之後便全部斷片，最後要從好友許廷鏗傳來的相片及第二朝酒醒時的記憶重組，「一路喺天台傾偈，去到一個moment，我好記得係許廷鏗send返啲相俾我，佢係攞住個背心膠袋，面容扭曲咁遞個膠袋俾我，我準備嘔啦，嘔完一輪我都走唔到，返唔到屋企因為真係太醉，跟住佢哋送我落去樓下個廁所，我攬住個馬桶，攬咗成晚，但最後我嘔咗喺隔離個浴缸度。」第二朝酒醒後，小巧收到陳詠謙的一張字條，「陳詠謙作為一個出色嘅文人，佢留咗一張字條俾我，『啊！小巧，你昨晚喝得很醉！』然後又講我喺邊度嘔咗啦，又寫咗佢嘅地址俾我，『如果明早你自己醒來的話，你就講呢個地址call車返屋企啦。』我第一次上人屋企、第一次同人去飲嘢，就嘔咗喺人哋浴缸度。」
接着二人大談貓經，Gin Lee剛到香港發展時養了兩隻貓「芝麻糊」及「杏仁糊」，不過芝麻糊三年前已離世，首次面對生離死別，Gin Lee坦言當時受到極大打擊，「我嚟香港先養佢哋，我又自己一個喺香港，所以佢哋係我嘅親人，一齊經歷過好多嘢，嗰陣時係好唔想接受，好想用盡辦法將佢bring back to life，但我做唔到呢樣嘢嘅時候，就發現呢樣嘢係我哋必經、亦都要必需要去面對嘅嘢，你控制唔到結果但係你可以把握、珍惜現在你有嘅every moment。」同樣有養貓的小巧又分享跟家中貓咪的開心時刻，「例如打爛我啲花啦、打爛我啲杯啦，有一年我自己屋企飲水隻杯我買咗八隻！」她又關心Gin Lee家中水杯是否「安好」，Gin Lee欣慰表示家中貓咪十分「生性」，「我兩隻貓好乖！從來都唔會整爛任何嘢。」小巧又謂家中貓咪「古怪」：「佢叼咗一條四腳蛇返屋企，唔係蟾蛇嗰種四腳蛇，佢真係四！腳！蛇！咁長嗰啲！我隻貓諗住將佢拖落個牀下底呀！我要捉住佢條尾：「唔准呀！」掟佢出房，我係喊住咁抹地、又要執佢，將佢撥落個垃圾桶，如果唔係嘅話，佢會一直喺嗰度。死啦，我發覺我啲貓都冇乜特別事令我感動，全部都係麻煩，但我一樣係咁愛佢哋。」
