本港第五波疫情嚴峻，每日新增確診個案仍有數萬宗，各個行業皆受打擊。昨日（3月15日）有一名網民於Facebook群組「小西灣富景花園居民聯絡組」發文指，該屋苑第9座地面行人通道有一速遞員，脫下口罩進食午餐。他炮轟在疫情肆虐香港底下，有人罔顧他人健康，影響環境衛生，表示已向屋苑物業管理公司及保安公司投訴，並要求跟進與處理。事件引起大批網民反擊，並紛紛斥投訴者不近人情。
林盛斌（Bob） 也有留意事件，他在社交網表示不認同投訴的網民，更力撐該名速遞員，「呢個世界，好多嘢，冇百分百嘅啱定錯，但係有一樣嘢，係最基本嘅，就係包容。呢段日子，對速遞行業嘅影響非常之大，因為人手不足好多時一個人要做三個人嘅嘢，一日幾萬單確診嘅時候，佢哋仍然辛苦工作，其實我真係好尊重每一位做速遞嘅工作人員。」
Bob又指該名速遞員亦在無可奈何地情況下，再席地而食，「你估如果佢有得舒舒服服坐喺餐廳入面食嘢，佢會唔會選擇坐喺個垃圾桶旁邊食呢個飯盒？人哋已經匿喺一個盡量唔影響其他人嘅地方，諗住嗱嗱聲扒埋嗰兩啖飯就繼續送貨送件，然後你影咗佢張相放上網諗住公審再去投訴，其實唔可以話你唔啱，你係有你嘅道理嘅，只不過成件事，好冇同理心，好唔善良。」
最後他更說若該名速遞員被解雇，他會替對方安排工作，「如果之後其士同埋進源投訴到去順豐，而呢位速遞員嘅上司又覺得個投訴係成立嘅，最後要紀律處分甚或至要炒佢魷魚，麻煩認識呢位速遞哥哥嘅朋友叫佢聯絡我，我即刻安排一份工俾佢。」
不少網民亦表示支持Bob，「Bob多謝你，香港就係要推勳多些包容。我地己經生活節奏好快，如果仲要互相斯殺，呢個地方會好可憐。」、「講得好好，佢哋真系好辛苦，日曬雨淋，抵你住大屋吖bob 」、「作為一位公眾人物，你講出心聲，好榜樣，你的孩子們為你驕傲！」圈中好友孫慧雪留言：「講得啱，佢已經匿埋食飯，仲想佢點！」吳若希則說：「啱呀～～～人係要食飯嘅！呢啲咁嘅環境，大家互相包容吓啦！」袁偉豪也指大家要將心比己：「 冇錯！一張相好難去定誰對誰錯，但有時候如果大家可以將心比己，停一停諗一諗，呢個世界就會少咗好呢一啲事情發生，會和諧很多。」
