許廷鏗（Alfred）最近拍攝啤酒廣告，繼上次表演拉枱布後，今次再大顯身手，表演花式足球，讓不少歌迷驚喜發現，原來官仔骨骨的他，都充滿運動細胞。拍攝當日，Alfred需要長時間控球及使出較剪腳踢花式，很久沒有踢波的他，笑言拍攝前一直好驚，到埋位時才發覺，波一上腳，記憶馬上回來，不需NG 已經踢到，大展幾下身手導演已經收貨。Alfred笑言：「其實以前喺大學都有踢U TEAM ，成為足球員係我細個其中一個願望，話晒我爸爸係足球教練，我哥都踢得好叻㗎！細個跟住佢哋都喺足球場上留下不少腳毛同足印，不過後來就放棄咗足球夢，參加比賽後就成為咗歌手啦！」
除了踢波之外， Alfred更在「大牌檔」拍攝，他坦言：「我真心好喜歡食大牌檔，第一次同客戶洽談廣告，我哋都係喺大牌檔傾合作。我又打兩份工啦，所以壓力唔細，每日放工令我最放鬆同最開心嘅活動，就係約三五知己食飯，而食飯最緊要係好食同人情味，所以我成日揀去大牌檔，同朋友邊食邊啤一啤係最無敵、最放鬆、最好氣氛。」
Alfred除了擔當牙醫、歌手身份，更一兼三職開設了個人頻道做飲食YouTuber，他話：「本身我真係好鍾意食嘢，成日四圍食，加上Fans同身邊朋友成日send啲餐廳俾我，所以一有時間，我都會去『搵食』，其實拍飲食節目一直都係我夢想，入行咁耐都冇機會，所以終於把心一橫開條Channel自己拍，一圓我拍飲食節目嘅夢，攞正牌喪食好嘢！」