衛詩雅（Michelle）早前到電台受訪，被薛家燕誤認為陳家樂老婆連詩雅，公開恭喜她有喜，爆笑全場。正所謂不打不相識，Michelle轉過來邀請家燕姐作客她的網上飲食節目《衛食攻略》，已於昨晚（14日）上架
今集節目一開始，Michelle便裝到神色凝重，對着家燕姐說：「我哋之前有啲誤會。」家燕姐立即又向Michelle恭喜，「衞詩雅，恭喜你提名最佳女主角！」Michelle立即捉着家燕姐雙手錫錫，「多謝你，家燕姐。」家燕姐重提舊事，「哎呀！真係尷尬啦，我仲摸你個肚啊。」兩人隨即大笑。
席間Michelle向家燕姐請教保養秘訣，家燕姐表示湯水及充足的睡眠十分重要，「我瞓四、五個鐘就夠㗎啦，但我隨時叉電，我即刻可以瞓到，可能係自細養成。」童星出身的家燕姐，經常趁未埋位補眠，為免整亂頭髮，習慣了可以睡但不會亂動。
這時Michelle八卦起來，問到家燕姐的感情生活，家燕展露出一個尷尬而不失禮的笑容說道：「有拍拖，有人知道我有個朋友仔細過我嘅，咁我梗係好保護關係啦，因為佢唔係我哋呢行。其實我咁嘅年紀，我唔會諗住再結婚，佢希望想結啦。」然後繼續大爆料，「可能人哋想有小朋友，但係我收咗經啦嘛！哈哈！我食咗靜心，吖！真係呀！唔使諗㗎啦嗰啲，哈哈。」
家燕姐又跟Michelle分享如何玩social media：「我個女幫我上連登，我問佢而家潮流興啲乜嘢，我就會盡量去做，好似《Flower》，我啲學生話：『家燕媽媽我哋全部都識跳。』我唔識跳會好瘀㗎嘛，自己又係校監。」至於「Captain Nancy」，家燕姐解說：「我覺得拎住個盾，嘩！好正喎！啲人就話呢粒墨係發光嘅，我影咗之後，咦？不如整個『Captain Nancy』啦，你就拉到一班年輕嘅觀眾啦。」
家燕姐以自身經驗「寄語」Michelle，不要在廁所瀏覽社交平台，「因為有一次我喺廁所睇Facebook，唔小心撳咗live個掣，哈哈！我兩個女，『嘩！媽咪你做乜嘢呀？你做乜喺廁所Facebook live！』嗰刻唔係好多人睇咗啫，我係大頭咁坐喺度，做緊一件好大嘅事！」
不少fans都會送偶像禮物，問到家燕姐收過最名貴的禮物？家燕姐坦言收過鑽石、金牌，試過有影迷幫她戴金牌，重到連件衫都撕爛了，當年亦很流行送銀紙牌。
