譚俊彥（Shaun）以「雙料視帝」身份，與前香港演藝學院副教授羅冠蘭，為本年度無綫藝員訓練班擔任客席講師，與來自香港、內地及馬來西亞學員分享演戲心得。Shaun即場傳授演喊戲心得，他先是幽默地解釋何謂「假喊」拉近與學員距離，再強調喊戲重點是要放鬆︰「我會用（演戲時）對手俾我嘅刺激，我會望住我嘅對手、利用空氣嘅流通你先放鬆到，慢慢你就Feel到對眼Hold唔住啲眼淚……其實你覺得自己好多眼淚咩？鏡頭上睇唔到，所以控制住唔好講嘢，到最後先望住對手講對白。」譚俊彥一邊說一邊瞬間眼泛淚光，教一眾學員紛紛驚歎兼拍掌。
事後羅冠蘭對Shaun讚口不絕：「佢對初心堅持、對熱愛表演嘅尊重，令我覺得好感動，所以我好錫佢。」羅冠蘭又大讚Shaun成為「雙料視帝」後，至今仍保持謙卑性格，沒有半點驕傲；Shaun亦謙稱還未成功，仍需繼續努力，還有很多事情要學。
