著名粵語片紅星嘉玲（何珮英）本月21日在泰國住所睡夢中離世，享年87歲。在嘉玲離世後，意外公開了資深演員黃栢文原來是嘉玲與前夫所生的大仔，栢文隨後亦與女兒飛到泰國，跟家人處理嘉玲身後事，為嘉玲在當地一間佛教寺廟舉行告別式。
隨着嘉玲遺體於上周六（26日）火化，無綫《東張西望》昨晚（28日）播出訪問黃栢文的片段，片段中有栢文在告別式上，哽咽說：「如果有來生的話，期望再同你再做一次母子。」
黃栢文受訪時還罕談父母婚姻：「媽媽同我爸爸年輕時一時衝動結婚，好快有咗我，我出世冇幾耐，佢哋離婚，因為媽媽要入行。離婚後就帶我到外國，由細到大都係由我祖母湊大，我唔記得幾多歲就回流香港，第一次見媽媽就係嗰段時間，你知由細到大我同媽媽冇接觸，媽媽係一個好靚嘅女人，但我同佢關係好疏離。媽媽嗰個年代身世要好清白，唔可以破壞明星光環。細個時係唔了解，但大個咗之後，我易地而處、從佢立場去睇，我從來冇怪過佢。」
直到栢文結婚，母子關係終現曙光。「直至我結婚，我循例通知佢一聲，佢點都係我媽媽，點知我通知佢，佢第日已經返嚟打電話俾我，帶我周圍去打點婚禮嘅嘢，因為我真係乜嘢都唔識，嗰個Moment開始我就覺得，我喺我媽媽心目中，係仔嚟嘅，唔係佢唔會咁緊張返嚟。」
栢文自爆30歲時曾患淋巴癌，獲媽咪嘉玲悉心問候和照顧，令栢文真正感到媽媽存在。他哽咽說：「我有咗Cancer，媽咪喺我醫緊嗰段時間，對我嘅關懷，對我嘅病情感到焦慮……完全俾我感受到母愛。其實我一直追尋母愛呢樣嘢，我終於感受到。直至我病咗之後，佢叫我唔好再搏啦，最緊要係我個女仲細，要睇住佢大，聽媽媽話之後，再移民同個女返去加拿大。」
栢文表示媽媽嘉玲非常在意他的演出：「坊間話我係『御用惡人』，佢（嘉玲）只在乎我每一個作品，可以講話由我入行，到𠵱家喺TVB拍嘅劇，佢都要睇，未睇到嗰啲，佢成日要我諗辦法攞俾佢睇，呢啲就係我可以交俾佢嘅成績單。佢冇反對或贊成我入呢一行，佢主要同我講，要有心理準備，同出面行業遇到嘅好唔同，佢同我講，做嘢最緊要真。」
在節目中，亦曬出嘉玲和姚武麟合照，該照片是栢文珍藏。他表示姚武麟和嘉玲結婚前，已知有栢文這個兒子，姚武麟不但不介意，婚後還對黃栢文視如己出。栢文說：「因為佢哋兩個，喺朋友面前：『我大仔』，我呢個繼父：『我大仔』，佢當咗我係佢個仔，只不過我成日改唔到口，成日叫佢做Uncle，由細到大出席任何場面，都唔想人知，都叫佢做Uncle。」
栢文表示繼父姚武麟身體OK：「只不過係腦水問題，導致佢平衡唔好，頭腦非常精靈。當然媽媽走咗之後，佢好傷心好傷心，因為媽媽養病都係返屋企，佢間房特別Set咗張病牀，所有儀器都喺度。我呢次返嚟，每次扶佢（繼父）入房、去洗手間，佢都會望住媽媽嗰張空置嘅牀，然後發呆一陣，我哋唔敢郁佢，佢望住張牀幾分鐘就流淚，幾分鐘之後佢再做其他要做嘅嘢。」
